- Reuben Lalnunthara Hnamte
Kan ram hi naupang enkawlna kawngah hian ti tha khat viauin kan lang a. Kohhran lamte pawh hian nasa takin tan an la tlang a, nimahse, kan tanrual dan erawh a inchen lo hle thung. Tunlai khawvel changkang tawh leh hmasawnna a zuan a zuang meka awm kan ni a. Nitinin internet lama hmasawnna thar kan hmu zel a, kan naupangte pawh hi an hriatna a thain an advance takzet tawh a. Sualna lah hian khawvel changkanna mil zelin tan a la a, naupang te rilrem zawng taka inawmtleina tur a ruahman zel a. Upa tam ber hi chuan kan fate hi kan umpha tawh lovin min tlankhalh nasa tawh a, chuvangin a enkawl dan thar hi chhungkua leh kohhrante hian kan ngaihtuah ngun a ngai tawh a ni. Inchhunga naute anga an la awmlai hian pawnlamah chuan an lo puitling fe tawh thin. Nu leh pa tam tak phei hi chuan an fa te awmzia hi an ngaihtuah lova, an ngaihsak lo, an awm awmin an awmtir mai a ni.
Sum leh paite pawh hi naupang enkawlna kawngah hian kan ui loh a ngai takzet tawh. Kan naupangte hi kan hmakhua leh tun atan pawh a pawimawh an nih tlat avangin ngaihtuahna tak tak sen angai ta a ni. Ram changkang zawkahte hi chuan Youth Pastorte hi an neihna a lo rei tawh a. Kohhranin hlawh neiin naupang leh thalai enkawl turin an chhawr tawp mai a, voluntary ngawt ai chuan an tangkaipui hle ni pawhin a lang. Theology lama hriatna nei M.div or B.D, M.th te an chhawr a, ram changkang zawkte chuan an hlawkpui hle ni pawhin a lang. Khuti chung pawh khuan khawvel changkanna leh sualna hian bu a khuar thuk lutuk tawh a, a harsa chu an ti ve thin viau hmel a ni. Keini ramah erawh hlawh nei lem lovin, naupang thawktu kan ruat a, tha tak pawhin an thawk tho; nimahsela, fulltime a thawkte nen chuan a kar a hla viau chuan a lang.
Kohhrante pawh hian youth pastor hi hlawh neiin chhawr ila, M.div, B.D.M.th te pawh kan nei nual tawh a. Fulltime in kan naupangte hi enkawl se la; naupanga thawkte nen a tul anga thawk hovin naupang lam rawngbawlna kalpui sela tun ai chuan nasa takin naupang enkawlna kawng hma kan sawnin a rinawm a ni. Kohhrante pawh hian naupang lam pual hian Budget hi dah ngei bawk ila, nu leh pate pawh inhawng zau sela, kan tunlai naupang enkawl harsat tawh zia hi ngaihtuah chungin inphal takin hma ila ang u. Tunlai kan ramah ruihhlo avangin he ti khawp hian chhungkaw tam tak leh khawtlang kan buai tawh a, tan lak nasat a tul a ni. Youth pastor kan neih chuan kohhran hi nasa takin min chhawk anga, naupang nu leh pate tan pawh a zangkhai khawp ang. Tunlaiah nu leh pa pawh hian kan fate hi kan enkawl hman ta mang lo chu a ni si a. Kohhranin a ti lo a nih pawhin khawtlang emaw, sorkar emaw hian hma lak a hun khawp mai.
Vawikhat cbu kohhran pakhat hian naupang camping an rawn neihpui a, naupang Junior leh inter chin 70 zet an rawn tel a. An naupangte an thain zuk leh hmuam han tiru leh han awmsual deuh hmuh tur an awm lova, karkhat chhung Pathian thu an zirpui a, hlawk an inti hle mai. An huntawp lamah phei chuan an zaituiin, testimony te mittui tla chung sawiin an va hmuhnawm tehlul mai em! Anmahni chu Burma lam atanga lo pem hlawm an ni a; an An naupang enkawltu chu hlawhneiin kohhranin an chhawr a. An naupang enkawltu chu ka kawm hial a, khati taka naupang an enkawl tha leh an thunun tha kha mak ka ti a ni. A hnenah chuan “ engtinnge naupangte hi heti taka in enkawl that le? tiin ka zawt a. Ani chuan “ kei hi Burma lam atanga M.div zo ka ni a, kohhranin naupang enkawl turin hlawh neiin min chhawr a, an skul ban apiangin Pathian thu zirpuina nitin ka nei a, an in lamah ka tlawh reng bawk a. Ka thawhtirh chuan kan kohhranah naupang 39 chauh kan nei a, tunah hian kum 4 vel ka thawk ve tawh naupang an rawn pung zel a, tun ah chuan 200 chuang kan nei tawh” a ti a ni.
Kei chuan “ In naupang enkawlte chu enge an chanchin zel ni a? kohhran chuan lawman an pe tha che em? Tiin ka zawt leh a. Ani chuan “ Kan naupang enkawlte chu an nungchnag zelah pawh tumah sualna lama han kal zui ka hre lova, kohhran thalaiah an inhmang chhovin kohran tan mi tangkai an ni chho tlangpui a ni. Kohhran chuan ka inawmna tawk min pe a, chu ai mah chuan nu leh pate atanga gift ka dawn hi a ropui “ a ti a ni. An kohhran hian kohhran puiin kumtin naupang tan Budget 2lakhs aia tlem lo an dah ziah a, nu hovin 1lakh an dah ziah bawk a ni. Kohhran lian tak an ni lova, mahse, an naupang ngaihsakna hi chu an kohhran hmalam zelah an la thatpui hle dawn niin a lang a ni. Hetiang tak hian nu leh pa leh kohhrante hian kan naupangte enkawlna atana ngaihtuahna kan sen hi a ngai tawh a. Kan tunlai naupangte leh thalaite nunzia tam tak hi chu a lungchhiatthlak a ni.
Tunlai khawvel thang mekah kan naupangte hi enkawl harsa kan tih chin a awm tawh a. Ram changkang zawkah Youth pastorate nei a, nasa taka kohhranten hma an lo kal lai pawh hian hun harsa tak kan tawk mek tawh a. Keini ramah erawh naupangte tana hma kan laka hetiang ang taka ngaihtuahna kan sen chuan thangthar loawm zel turah insiamthat theih a nih a la rinawm khawp mai. Keini pawh hi kan tlai lek lek tawh a ni a, nimahsela, siamthat theih loh khawp chuan kan la tlai chhe lo turah chuan a ngaihtheih a ni. Tunlaiah hlawh neia inchhawr tawp a nih loh hi chuan thiltih hi a har tawh a, voluntary ringawt kan duhkhawp kan hmu tawh lo a nih hi. Nitin kan khawsakna leh ei lehin kan lo mahna a sang ve tulh tulh tawh si a, chuvangin tunlai ang mil zela kan chet a hun tawh a ni. Hawh u tan ila thar ang u hmiang, Pathianin thuin kan ram chu min la chiah reng a, ngaihtuahna leh tha leh zung senga hma kan lak chuan kan la tlai loving. Kan Bible pawhin Naupang chu a kalna âwm kawngah chuan zirtîr ula, a upat hun pawhin a thlah lo vang.” (Thufingte 22:6 ) a tih kha maw.