Aizawl: Mizoram State Rural Livelihoods Mission (MzSRLM) hnuaia din, Ropuiliani Women Farmer Producer Company Limited (FPC) chuan a shareholder-te thar chhuah, Aieng metric ton 71 (kg 71,600), Kolasib leh Mamit district atanga a leisak chu nimin khan Lalmuanpuia, District Mission Director/Project Director, DRDO Kolasib District chuan Kolasib DC Office Complex atangin a vai liam.
Khuallian Lalmuanpuia chuan MzSRLM hnuaia agri-marketing value chain atana din Ropuiliani Women FPC in Kolasib leh Mamit district huam chhunga a shareholder-te hnen atanga a leisak Aieng MT 71 zet, SSB AGRO LLP, Mizoram hnena hralhchhuah a ni chu lawmawm a tih thu a sawi.
Ropuiliani Company chu kuthnathawktu Self Help Group (SHG) te tana innghahna tlak ni ngei tura Ministry of Rural Development-in a din a nih thu sawiin Lalmuanpuia chuan, SHG te hi mi taima tan chuan chhungkaw eizawnna nghahchhan nghet a nih theih thu leh, sawrkar flagship programme-ah pawh sawhthing, aieng leh hmarcha te hi kuthnathawktute tharchhuah zara ramin hma a sawn theihna tur atana tum ber a nih thu a sawi bawk.
Ropuiliani Women Farmer Producer Company Limited hian tun dinhmunah district pasarih leh RD Block 16 huam tel tawhin shareholder (SHG) mi 9,500 chuang an inziak lut tawh a. An member-te hnen atang hian sawhthing leh Mizo hmarcha te leisak tawhin tun dinhmunah district dang atangin aieng leh sawhthing lei leh turin ruahmanna a kalpui mek a ni.
He company hian heng thlaite hi a hringa hralh chhuah piah lamah company processing unit, Chhingchhip-ah value addition kalpui mekin hmalak chhunzawm zel tum a ni.