Russian tuialhthei phur lawng lian chu Communist enkawl thliarkar ram, Cuba-ah a lut niin Russia news agency-ten an tar lang.
Tun hi January thla hnua Cuba-a tuialhthei thleng leh hmasa ber a ni a, US President Donald Trump-a’n Russia tela ram hrang hrangten he thliarkara an thawnah harsatna a awm loh thu a sawi hnu darkar eng emaw zat hnuah a thleng a ni.
Trump-a thu sawi hian January atanga a sorkarin Cuba-a tuialhthei phurh luh khapna a siam chu tihtawp a nih tih a tilang nia ngaih a ni.
Cuba hian ram pumah power supply an nei lo fo va, tuialhthei phurh luh khap vang hian an tlakchham nasa hle a ni.
Russian chanchinbute chuan Russia tanker Anatoly Kolodkin hian crude oil ton 1,00,000 zet a phur niin an tar lang.
Kar kal ta khan World Health Organization (WHO) chuan tuialhthei tlakchham avangin Cuba damdawi inte chuan emergency leh intensive care service chhunzawm turin harsatna an tawk mek niin a lo sawi tawh.
January 3 atang khan Cuba dinhmun hi a chhe hle a, US sipaiten Cuba sorkar nena inthuruala duhsak taka tuialhthei pe thin, Venezuela hruaitu, Nicolás Maduro-a an man hnuah an buai hle a ni.
Trump-a hian Cuba-a tuialhthei thawntu tu pawh chhiah sang laksak tumin a vau zui a ni.
Chawlhkar khat chuang kalta khan US Treasury Department chuan Russia atanga tuialhthei thawn phal lohna ram zingah Cuba a dah tel a; mahse, kal phung tihdanglam nia langah Trump-a chuan Pathianni khan Air Force One-a thuthar lakhawmtute a kawmnaah Russia-in Cuba-a tuialhthei a thawn chungchangah engmah harsatna a neih loh thu a sawi leh ta a ni.