Aizawl: Aizawl South III bialtu MLA Baryl Vanneihsangi chungchang social media-a mawi lo taka thu thehdarhtua puh, ‘Rfa Rfralte’ chu court phalna angin Cyber Crime Police te chuan an chhuah.
The Zozam Times zawhna an chhan danin Cyber Crime Police hotute chuan, ZPM Zonu Hqrs.-in social media-a MLA Baryl Vanneihsangi mawi lo taka an puhna chungchanga Cyber Crime-ah FIR an hneh luh hnuah, a puhtu Facebook-a account ‘Rfa Rfralte’ neitu hi man a ni a, zan thum chhung police lam hian an kawl a, a phone an kawlsak hnuah pawh ‘Rfa Rfaralte’ account hmang hian thu post a la awm zel a, a e-mail hmanga chhui zui zel niin India ram pawn thlenga chhui thlen a ni a, India ram pawna atanga tih niin an ngai a, an mi man hi court phalna angin an chhuah ta a ni.
March 26, 2026 khan ZPM Zonu Hqrs. chuan Cyber Crime Police Station-ah ‘Rfa Rfralte’ lakah hian FIR an theh lut a, ‘Rfa Rfralte’ inti hian Facebook Group – Zoram Politics leh News Group-ah Baryl Vanneihsangi thlalak pahnih dahin a caption-ah ‘Hman deuh khan milian hoin duh duh huna koh theih nu kha a ni ve tlat, tunah pawh an la ko reng thinin ka ring’ tih a ziah vang a ni.