Chief Minister Lalduhoma chuan Nilaini zing dar 6:30 khan chhiarpui atana mahnia inziah luh bul tanin, a chenna inah Census of India 2027 Phase-I (Houselisting leh Housing Census) self-enumeration hlawhtling takin a nei a. India ram chhiarpui 2027 Mizorama bul tanna a ni.
Chief minister hi Directorate of Census Operations, General Administration Department leh Aizawl Municipal Corporation official-ten an tawiawm a. Chhiarpui an kalpui zuina turah duhsakna a lo hlan a ni.
Chief Minister a inziahluh hnuah Nilaini zing dar vek khan Home Minister K. Sapdanga leh PWD Minister Vanlalhlana te pawh an chenna inah an inziak lut bawk.
Census of India 2027 hi thawh hniha kalpui tur a ni a. Thawh hmasa zawk Houselisting leh Housing Census hi April 1, 2026 atanga tan a ni.
Thawh hnihna Population Enumeration hi February 2027-ah neih tan tur a ni ang a. Tun tum census hi digital hmanga census kalpui hmasak ber tur a ni dawn a, mahnia Self-Enumeration tih theih a ni.
Self-Enumeration hun hi April 1 atanga April 15, 2026 thleng a ni a, April 16 atanga May 15, 2026 thleng House Listing leh Housing Census Mizoram pumpuiah kalpui a ni ang.
Mahnia inziak lut turte chuan official portal (se.census.gov.in)-ah mobile phone hmangin inziahluh theih a ni a. Form submit hnuah Self-Enumeration ID (SE ID) a lo chhuak (generate) ang a, hei hi enumerator-te an lo kal hunah lo pek tur a ni.
Sorkar chuan chhiarpui hi tluang leh fel fai taka a kal theih nan khua leh tuite chu mahnia inziak lut turin a ngen a ni.