Badminton khel thiam hmingthang berte zinga mi, Carolina Marin-i chuan a khup hliam dam thei lo vangin professional badminton khelh a chawlhsan thu a puang.
Spanish shuttler kum 32 mi, Olympic champion leh world champion vawi ni tawh hian social media-ah video hmangin a chawlh thu hi a puang a, a hun ropui a tawp ta a ni.
Amah thlahna hun atana an lo ruahman, kumin European Championships, an rama nghah turah pawh a inlan theih dawn loh thu a tichiang bawk.
“Professional badminton ka khelh thin chu a tawp ta; chuvangin, Huelva-a European Championships neih turah hian ka inlan dawn lo a ni,” tiin Marin-i chuan a sawi.
World No. 1 hlui hian thutlukna a siam chhan chu lungkuai taka inkhelh hnuhnun ber neih aiin nakin zela a hriselna ngaih pawimawh zawk a ngaih vang a nih thu a sawi chhuak.
“Badminton court-ah a tawp nan inhmukhawm ila ka ti hle a; mahse, chumi atan chuan ka taksa hi dinhmun derthawngah ka dah duh lo. Vawi tam tak ka lo sawi tawh thin a, ka thutluknaah hian ka ding nghet a ni,” tiin a sawi belh bawk.
Marin-i vanglai hi chanchin ngah tak a ni a, heng zingah chuan Rio 2016 Olympic-a gold medal a lak leh 2014, 2015 leh 2018-a world championship-a a hlawhtlinnate a tel.
Indian mipuiten PV Sindhu nena nasa taka an lo inel thin kha an hre reng tawh ang a, Rio Olympics final leh 2018 World Championships final-ah te khan Marin-i hian Sindhu-i hi a hneh ve ve a ni.
A vanglai hun a tawp dan chungchang ngaihtuah letin Marin-i chuan dan dang deuh hleka chawlh a lo inbeisei thin thu a sawi a. “Ka chawlh dan hi dan dang deuh ni se ka ti khawp mai a; mahse, nunah hian kan duh danin thil a kal reng thei lo va, chu chu kan pawm thiam a ngai a ni,” a ti.
Badminton court-a a inlan hnuhnun ber chu Paris 2024 Olympics kha a ni dawn ta a, a khup hliam vawi hnih ngawt a tihnat hnua ropui taka a rawn inlan lehna a ni.