Aizawl: Goa Mizo Welfare te chuan Thawhlehni tlai dar khan Sneh Banquete Hall, Porvorim-ah Chapchar Kut an hmang a, Central YMA President R Lalngheta chuan khuallian niin a hmanpui.
Goa Mizo Welfare te hian hun then thawh khatnaah Fresher Social anga hun hmangin, a thawhhnihnaah Chapchar Kut 2026 lawmin hun an hmang chhunzawm a ni.
Goa Mizo Welfare President Rev Lalrinsanga kaihhruai Goa Chapchar Kut-ah khuallian R Lalngheta chuan Mizo thalai rual fel tak tak, mahni tan leh chhungte hnena pawisa Mizoram budget tel miah lo a sum thawn thei eng emaw zat an awm chu, ram leh hnam tan an hlu a, thalai rual la rawn kal ve leh zel turte tan ambassador an nih thu a sawi a. Mizo thalaite hi zu leh ruihhlo avanga buai mai mai hman an ni tawh lo, zu tamna hmunah pawha zu in ngai lo thalai tam tak an awm avangin Mizote an tihmingtha a, mi dang tan hnathawh ve na tur kawng an hawng zel tih a sawi.
Khuallian Central YMA President R. Lalngheta hi Central YMA Finance Secretary MS Ralte-in a tawiawm a, thu a sawi bawk.
Goa Mizo Welfare-ah hian tun dinhmunah member 1200 chuang an awm mek a ni.