Aizawl: Salem Veng Branch YMA-in Thawhlehni zana YMA kum puan ‘Ruihhlo do’ hawnna inkhawm an buatsaihah Central YMA Vice President Prof Lalnuntluanga’n a hmanpuiin kum puan a hawng.
Kumpuan hawnna inkhawmah Central YMA Vice President Prof Lalnuntluanga chuan ruihhloin mi mal, chhungkua, khawtlang a tihbuai nasat thu sawiin, a bikin thalaite a tihchhiat mek a sawi a. Ruihhlo chu tih tak taka do a tul thu a sawi a. Ruihhlo do chu chhungkuaah bul an tan that leh a, nu leh paten an chenna in theuh fate tan ‘home’ ni tura tan an lak thar a tul thu leh pawl leh kohhran ten thapui thawha an do a tulzia a sawi a. YMA member ten an kumpuan a ni tih hriaa theihtawp chhuah turin kalkhawmte a fuih bawk.
Thawhlehni zan vek khan Chawlhhmun Branch YMA chuan an veng Community Hall-ah YMA Kumpuan ‘Ruihhlo Do’ hawnna inkhawm an huaihawt a. He hun hmanpuitu Central YMA General Secretary Prof Malsawmliana’n hmanpuiin kumpuan a hawng.
Kumpuan hawngtu Prof. Malsawmliana chuan, ruihhlo hluar avangin khawtlang nunah pipu nun mawi tlawmngaihnate, inlainat tawnna te a tlakhniam phah tih sawiin, “Ruihhlo zuarte pawh khawtlang tan mi hnawk an lo ni ta a, ruihhloin kawng tinrengin Mizote min run a ni ber mai,” a ti.
Prof Malsawmliana chuan, YMA hian khawtlang nun siamthat leh Zofate hmasawnna ngaihtuah hi an hna pui a nih angin ram nuam leh him, khawtlang nun nuam an neih theihnan khawtlanga sual chi hrang hrangte hi an do tlan a ngai tih sawiin, ruihhlo tello khawtlang nun nuam siam tura tangrual turin kalkhawmte a sawm.
Thawhlehni zan vek khan Lungverh Branch YMA chuan YMA kumpuan ‘Ruihhlo do’ hawnna hun an hmang a. Kumpuan hi SF David Ngursangzuala, Asst Secretary, CYMA chuan a hawng a ni.