Aizawl: Sihphir-ah dan kalha leitha hralh chhui chhuah a ni a. Mizoram State Agriculture, Horticulture and Marketing Cooperative Federation (MAHFED) Ltd-in show cause notice a pe.
MAHFED Ltd. chuan Sihphir leh a chhehvelah Fertilizer (Control) Order, 1985 kalha lei tha (urea) hralh ruk leh dan lova pek chhuah a awm niin thu a dawng a. Hei hi bawhzuiin, March 20 leh 23, 2026 khan managing director chuan Sihphir-ah, a hmun ngeiah enfiahin, lei tha pek chhuah a nih dan zirchiangin kut hnathawktute a kawm a. Hengte atang hian Urea, a mamawhtute tana sorkarin man tlawm zawka a pek chhuah thin chu sorkar bithliah, bag khat (kg 45), Rs. 260.40 aia sang tak, bag khat Rs. 450 tea hralh a ni tih an hmu chhuak.
He thil hian M/s Zekyl Enterprises chu inhnamhnawih nia hriat niin, he enterprises hian Fertilizer (Control) Order, 1985-in a phut lehkha pawimawhte pawh a neilo nia hriat a ni bawk a; hei hian FCO 1985 Clause 7 a kalh avangin, MAHFED Ltd. chuan hma la nghalin ‘Show Cause Notice’ a pe nghal a ni.
Thuneitute nen tangrualin M/s Zekyl Enterprises hian dan kalha hma a lo lak tawhnate chhui zui nghal a nih bakah, a rang thei ang bera dan kalha hmalakna awmte tihtawp leh dan kalh a che nia hriatte chunga dan ang taka hmalak dan tur a ngaihtuah nghal bawk.
Sorkar chuan kuthnathawktute dikna chanvo tihbawrhbansakna leh dan kalha chetna te uluk takin a vil zui zel dawn a. Heng thila inhnamhnawih lo tur leh sorkar lo thawhpui zel turin mi zawng zawng a ngenin a hriattir.