MNF Thalai President Robert Romawia Royte chuan ZPM sorkarin SASCI sum sanction sa Rs nuai 11,152 a ti-lapse leh a. Sum dah sa Rs nuai 32,800 a lapse vek bawk tih a sawi.
Inrinnia Aizawl Press Club-a thuthar lakhawmtute a kawmnaah Hachhek bialtu MLA chuan ZPM sorkar tirh. kum 2023-24 khan SASCI Part I sum sanction sa thlap Rs nuai 23,331 chu 1st instalment sum a implementing department a pek tlai avangin a lapse vek tawh a, financial management thiam loh avanga he sum lapse hi a pawi hle a, heta tanga central leh state sorkar sum chan ve tur GST leh labour cess pawh Rs nuai 4,433 pawh a lapse tel vek tih a sawi.
Robert Romawia Royte chuan kum 2025-26 hian SASCI Part I hnuaiah Mizoram tan Rs nuai 32,800 dah sa a ni a. Part-I hi ‘untied fund’ niin infrastructure eng atan pawh hman theih a ni a. Dah sa (allocated) a nih ang leh Mizoram sorkar dil angin Rs nuai 32,800 chu project 41 atan sanction tawh a ni a, Mizoram sorkar finance department pawhin he sum atan hian administrative approval a pe thlap bawk tih a sawi a. SASCI Part I dan angin he sum, Rs nuai 32,800-a zaa 66 (Rs. nuai 21,648) chu 1st instalment-ah Mizoram sorkarah release nghal a ni a, 1st instalment Rs nuai 21,648 chu dawng reng siin UC an submit theih loh avangin 2nd instalment sanction sa thlap Rs nuai 11,152 chu a lapse leh ta vek niin a sawi.
Hei bakah hian SASCI Part I-a 2nd instalment hmu tawh hmarchhak state-ten SASCI Part I a original amount zat an hmu leh thei a, chu chu Mizoram tan chuan Rs nuai 32,800 a ni tih sawiin Robert Romawia Royte chuan, “Hmarchhak state dang zawng zawngin he sum additional hi an hmuh theuh laiin Mizoram sorkar chuan dere pawh a hmu ve lo va, kum 2025-26 atana Rs nuai 32,800 dah fel thlap tawh si hi a kum a liam hnuah a dil theih tawh loh avangin Mizoram tana Rs nuai 32,800 pawh hi financial year a liam rualin a liam ta vek a, Mizoram tana dah hran sa ni mah se a lapse ta vek a, a uihawm tak zet,” a ti.
Robert Romawia Royte chuan ZPM sorkarin kum liam ta mai, kum 2025-26 chhunga SASCI Part I hnuai bika Mizoram chan sum Rs nuai 43,952 chu a ti-lapse vek tihna a nih thu a sawi.