- Laiu Fachhai
He article tawiteah hian Tumkau Ni, Khenbeh Ni leh Thawhleh Ni chheh vela thil thlengte atanga zir chhuah turte sawiho kan tum ang a, amaherawhchu zir theih tur zawng zawng ziak tlar vek lo in, thenkhatte chauh tihlan kan tum dawn a ni.
- Tumkau Ni (Palm Sunday)
Mithiamte sawi danin, Tumkau Niah khan Roman Governor Pontius Pilate chu sakawr chung chuangin khawthlang lam atangin Jerusalem khawpui a rawn lut a, lei leh van Lal ber, Lal Isua pawh sabengtung no chung chuangin khaw chhak lam atangin a lo lut ve bawk (Mathaia 21.1-11). Khatih lai khan Judai ramah chuan milianten sakawr chung an chuang a, mi nawlpui leh rethei zawkte chu kea an kal loh chuan sabengtungah an chuang thin. Sakawr khan khawvel lalna leh hausakna, mi vantlang chunga awmna a entir a, sabengtung khan Pathian mite tlawmna, rilru thianghlimna leh an kaihhruai mipuite level-a awmna a entir a ni. Tunlai kan ramah hian sakawr (car) lian leh mantoa chuang a, an hruai mipuite chunga leng, ram leh kohhran hruaitute nge tam zawk ang, Lal Isua anga inngaitlawm, mipuite chunga indah lo leh leng lo, mipuite zinga mipuite anga awm ve, sabengtung (car) te chi leh mantlawma chuan mai tum nge tam zawk ang? Tunlai khawvelah chuan car chuan duh dan atangin rilru puthmang a lang duh hle thin.
- Khenbehna Ni (Good Friday)
Lal Isua man tir tura report-tu kha a zirtirte zingami ngei Juda Iskariota a ni a, an pawl sum enkawltu treasurer a ni nghe nghe. Nimahsela hruaitu rinawm lo leh sum duham rûkru a ni a, a sum kawl eiru thin a ni (Johana 12.6). Chuvangin, khatianga a hotupa Lal Isua a phatsan kha thil mak a ni hran lo. Tunlai ram hruaitu, kohhran pasitawr leh upa, kohhran pawl hruaitu leh NGO hruaitute leh sawrkar, kohhran leh pawl sum chunga thuneitu Kristiante zingah hian hruaitu Juda Iskariota anga sum leh paia rinawm lo leh sawrkar, kohhran leh pawl sum eiru thin an awm ve ang em? Juda Iskariota khan a thiltih dik loh a inhriat meuh kha chuan a tlai lutuk a, a tan a pawi ta a ni (Mathaia 27.5; Tirhkohte 1.18). Sum leh pai duhamna kawnga Juda Iskariota kawng zawh kha zawh mektu tunlaia kan ram, kohhran leh pawl hruaitute pawhin an sim loh chuan, an tan a tlai lutuk ve thei ang. Lal Isua khenbeh laia khenbeh ve pakhat ang khan, a huntea simin an thiltihsualte an chawlhsan erawh chuan, chhandamin an awm ang (Luka 23.42-43). Hei hi hruaitu ni lo, thil tihsual nei mek mi tin tan pawhin a dik.
- Thawhlehna Ni (Easter Sunday)
Khatih hun lai khan hmeichhiate rahbeh, hnuaichhiah leh hmuhhniam hun a ni a, Lal Isua erawh chuan hmeichhiate chu chutiangin a en ve lo. A zirtir mipaten an kirsan tawh hnuah pawh hmeichhiate chuan kraws thlengin an zui a, sabbath chawlh hnu a tukah Isua thlan tlawh hmasa bertu an ni bawk. Chuvangin Isua pawhin hmeichhiate chu a hmangaih hle a, a hmangaih chauh ni lovin, Kristian kan nihna chhan ber a thawhlehna chanchin tha (1 Korinth 15.14-20) hrilh hmasa bertu ni turin mawhphurhna a pe phal a ni (Mathaia 28.9-10; Maka 16.9-10; Johana 20.17-18). Tunlai kan ram dinhmun enin, hmeichhiate rahbehna, hnuaichhiahna leh hmuhhniamna ram, hnam leh kohhran kan ni em? Hmeichhiate ring ngam lo leh hruaitu nihna mawhphurhna pe phal lo kohhran kan ni em? In ngiahtuah chian a hun tawh takzet a ni.