Aizawl Municipal Corporation (AMC) inthlan a hnai telh telh a, political party hrang hrangin thapui thawhin tlin ngei tumin campaign auhla an nei zel, mipui lam pawhin kan lo thliar thiam a tul tak zet.
Aizawl khawpui chhung enkawl tura kan thlan tur an nih miau avangin hmathlir nei tha kan thlan thiam a tul a, a phur leh sawi thiam nazawng ni lo kan thlan thiam a tul hle awm e.
Eng party pawhin sorkar-na lo siam se, a mihringte zawk hi kan en hmasak tur leh an dinhmun kan thlir tur an ni dawn a, rintlak leh rin ngam kan thlan thiam a tul hle.
Party tin candidate te an tha em em vek a, campaign dan pawh an thiam viau tawh nia a lan lai hian, lo tling ta se an nunzia leh hawiherin a pha dawn em, rintlak leh rin ngam an ni dawn em tih kan enfiah fo a tul a, an chezia leh hawiher thlenga kan uluk a va ngai em.
AMC sorkar thar chu a piang mai ang. Mahse, min bialtu tur leh rorel tur zawkte hian eng nge hmathlir an neih, eng nge khawpui than zel nan hian ruahmanna an neih thlengin lo chik peih ila, mipui lam hian kan aiawha thutthlenga thu turte hi chik leh zirchianna chang i lo hre teh ang u.