AH&Vety Minister C Lalsawivunga kaihhruaina hnuaiah nimin khan Mizoram State Veterinary Council Hall, Khatlaah department-in scheme a kalpui mek chungchang an sawi ho.
AH&Veterinary department secretariat leh directorate officer te nena scheme sawi honaah hian minister chuan AH&Vety department chu ranvulhtu tanpui ngaite tanpuitu an nih angin thahnemngai turin leh ran vulhtuten harsatna an tawk a nih pawhin a rang lama mahni theihna zawnah hmala thuai thin turin a chah a. Hemi kawngah hian directorate leh district lamte pawhin zirtirna uluk zawka pek a tul thu a sawi.
Minister chuan ran chaw lama harsatna an tawh thin chungchangah chak taka hmalak niin, ranchaw tam zawka an thar chhuah theih nan Mizoram chhungah ranchaw chinna tur hmun remchangte zawng turin hmalak a nih dawn thu a sawi a. Ran insurance tha tak a awm tawh thu sawiin, hemi chungchang hi district leh block-ah inhrilhhriatna neih a, ran vulhtuten tangkai taka an hman a duhsak thu a sawi.
Sa leh artuiah Mizoram intodelhna kawngah department-in mawh a phurhzia sawiin mahni awmhmun chauh duhtawk lova zin chhuaka ranvulhtute hmun ngeiah an harsatnate hriatpuia theihtawp chhuah turin a chah bawk.