Liverpool chuan nipui chawlh lo awm turah an player-te siksawi nasat an tum hle a, tun atangin ruahmanna an siam tan niin an sawi.
Manager Arne Slot chuan a hna chelh chhunzawm zel tumin beihpui a thlak mek a; mahse, an player neih sa eng emaw zat chu mi thar lo lut turte tana hmun kian turin chhuahtir an tum a, hralh tur pawh an chhawp chhuak tan.
Cody Gakpo, Joe Gomez, Alexis Mac Allister leh Federico Chiesa te chu hralh theih tura chhawp chhuah an ni dawn a. England midfielder Curtis Jones hmabak pawh a chiang lo hle a, chutih laiin left-back Andy Robertson chu World Cup-a Scotland captain a nih zawhah a chhuak dawn bawk.
Reds hian centre-back Ibrahima Konate chu chelh an tumna kawngah an beidawnsan titih tawh a, he France international contract hi June 1-ah a tawp dawn a. Mohamed Salah chuan kar khata £350,000 a hlawhna thuthlung chu kum khat la awm mah se a chhuah tur thu a puang tawh bawk.
Kum hnih chhung Liverpool transfer policy lo enkawltu, Sporting director Richard Hughes-a chu Saudi Pro League club pakhatah a chhuah rin a ni a. Kum 2024-a German coach Jurgen Klopp a chhuah khan Hughes-a hian a thlaktu turin Slot hi a lo rawt a ni.
Hughes-a hi nipui laia Crystal Palace atanga Marc Guehi lak luh theihna hun tha an bawhpelh chungchangah khan an puh tel bawk a. England defender hi January thla khan an elpui Manchester City-ah a lut a ni.
Neitu Fenway Sports Group (FSG) chuan chief executive of football Michael Edwards pawh Saudi Arabia-a kal tura thlem thluk a nih mai an hlau hle.
Edwards leh Hughes te chuan squad siam that dan tur ruahmanna an zam tawh a, Slot chuan Premier League nomawi an lak hnua nipui laia £ maktaduai 426 an hmang chung pawhin player indaih lohna leh that tawk lohna an neih thu a sawi.
October thlaa Carabao Cup-a Palace laka 0-3 a an tlawm hnuah khan Dutch coach Slot chu, “Miten an sawi thin angin squad lian tak kan nei lo,” tiin a vui a ni.
“Pawisa kan hman zat khan ngaihven a hlawh lutuk a. Mite chuan player 25 ngawt theh chhuah tur kan neih an ring a. Mahse, player 20 chiah kan nei a, chutah hliam tuar pali kan nei bawk,” a ti.
A tawng chhuah danah hian FSG chu an lawm lo hle a, Slot-a contract hi kum khat chiah a awm tawh a, contract thar ziah chungchanga inbiakna pawh tihtawp lailawk a ni.
Anfield-ah squad an nei chhah lo hle tih chu an pawm a, kuminah hian holding midfielder thar lak luh chu an thil ngaihpawimawh ber a ni dawn a ni.
Brighton midfielder Carlos Baleba, Palace midfielder Adam Wharton leh Nottingham Forest midfielder Elliot Anderson te chu lak luh tura an hming sawi rik nasat pawl an ni. Real Madrid midfielder Eduardo Camavinga pawh £ maktaduai 43-a lak theih tura ngaih niin Arsenal pawhin an ngaihven ve bawk.
Slot thlaktu tur hian Real manager hlui Xabi Alonso lo lut ta se, ani chuan Argentine World Cup-winner Mac Allister-a’n Anfield a chhuahsan rualin Spanish club lian atangin Turkish attacking midfielder Arda Guler lak luh a duh hle ang.
A naupan lai atanga Liverpool tan em em thin, Newcastle United midfielder Anthony Gordon chu £ maktaduai 80 man ni mah se Liverpool hian lak luh atana an duh ber a la ni reng a ni.