Aizawl: Social Welfare Department hotute leh Mizoram Synod hotuten Thawhtanni khan ruihhlo ngaite enkawlna thin Jordan Center tlawhin an enfiah.
Mizoram sorkar chuan Jordan Center hi Mizoram Synod enkawl turin kum 15 atan inremna a ziah pui tawh a. A hmunhma, building leh a chhung bungrua awm te hi a nih ang ang a inpek turin an lo inrem tawh a ni.
Jordan Center-ah hian Quarters building pakua, chhungkaw 30 vel awm theihna te, office building, damdawi in bakah hmeichhia leh mipa ruihhlo ngai enkawlna hmun a hrang ve ve fencing tha tak nen a awm a. Ministry of Social Justice & Empowerment norms leh guidelines anga din a nih avangin building hrang hrang counselling, detox, recreation, dorm, chapel leh adangte, a awm kim bakah, bungrua pawh a awm tha bawk a, training equipment pawh tam tak a awmsa bawk.
Building te hi lian vak lo, a hrang hrang a nih avangin tun dinhmunah mi 70-100 bak an leng lo va. A zavaiin building inhlanchhawn tur hi 40 a awm a ni.
Jordan Centre enhonaah hian building thawmthat ngaite leh thil mamawh belh te enho nghal a ni a. Synod lam hian kumin June thlaa SEC-ah an kalpui dan tur hi an rel fel dawn a ni.
He hunah hian Social Welfare Department hi Joint Secretary Zonunthari hovin official panga an kal a. Mizoram Synod lam hi Moderator Rev John Raldosanga bakah Synod Social Front atangin Rev K. Lallawmzuala, Executive Secretary, Rev P. Zohmangaiha, Secretary, Rev. Lalrinmawia leh member dang mi pathum an kal a ni.