Khawvel buaina avangin kan ramah pawh oil leh gas renchem a tulzia kan inhrilh chho ve ta zel a, kan hma lam hun hriat ni lo mahse, theihtawpa kan lo inhmakhua leh ruahman thiam hi chu a ngai ve hrim hrim reng a ni.
Hetih lai hian kan mamawh tawk kan ramchhungah pawh sorkar in a lalut a, kan mamawh milin engkim lakluh a nih miau avangin vawiin thlengin harsatna zakhua kan la tawk lo a, thuneitute khap chin erawh kan zawm thiam a tha hle.
District hrang hrang bawrhsapin oil leh gas, a bikin oil bik hi dan lova ramdang leh hmun danga phurhchhuah leh zawrhchhuah a khap a, a hremna pawh a nep lo hle tih kan hriat thar a va tul em.
Hetiang khap a ni tih hrereng chunga la tilui duh leh a hlawk e tih avanga a ruk a rala chet lak duh an la awm thin erawh a pawi a, hengte hi hnam hmelma, ram hmangaih lotu khawsazia a ni.
Kan state in a mil tur leh a mamawh tawk tur, harsatna deuh a lo awm palh a nih pawha kan buai lohna tur a ngaihtuah mek laia dan lova lo sumdawng an awm leh thin hi a pawi a, sorkar pawh hian enzuiin, a tul a nih chuan a hremna pawh hi na zawk leh khauh zawkin lek se a duhawm hle.
Khawvel buaina leh oil leh gas a buaina thleng thut thei reng hian eng chen nge a awh ang a, engtia rei nge dinhmun himah kan awm dawn hriat a nih rih loh miau avangin dan dik taka khawsak zel i tum rih phawt teh ang u.