Home Minister K Sapdanga chuan Aizawl Municipal Corporation (AMC) inthlan lo awm turah ZPM chuan eirukna laka fihlim thei tur hlir candidate an thlang chhuak tih a sawi.
ZPM Thalai buatsaihin nimin khan Aizawl khawpui hmun hrang hrangah ZPM chuan street campaign an nei a. He huna thusawitu, home minister ni bawk, K Sapdanga chuan AMC-ah hian sirukna hi awm tawh lo se an ti a, ZPM manifesto-ah pawh AMC-ah Pathian ram thleng rawh se an tih avangin an hotute pawhin eirukna laka fihlim thei tur hlit candidate an thlang chhuak a. Pathian leh mipui zara chakna an chang a nih chuan an candidate-te pawh VUC-ten an vil reng dawn tih a sawi.
ZPM chuan an hnathawh hmangin an campaign ang an ti a, AMC inthlan an hmachhawn turah pawh Aizawl mipuite hi an kawng siamte thlirsak tur leh eiruknaah an fihlim leh fihlim lohte ensak a, thlan tlin leh tlaka an ngai a nih chuan thlang turin K Sapdanga chuan mipui a ngen a. AMC-ah hian fund eng emaw zat a awm ve a, chhiah eng emaw zat lak a ni ve bawk a, heng fund leh chhiah pek tlingkhawm hi Aizawl khawpui tan hian hmasawnpui tham a nih thu a sawi bawk.
AMC-ah ZPM-in hnehna an chang a nih chuan bawlhhlawh sawngbawl dan mumal zawk an siam dawn tih sawiin UD&PA minister ni bawk, K Sapdanga chuan door to door collection pawh tih tum a nih thu sawiin Hualngohmun khaw daiah in sakna bungraw chhia sawngbawlna an siam mek a, khawpui chhungah in sa an awm reng a, in sak phalna lak ngai thin leh buaithlak tak chu ennawn a ni ang a, hei aia awlsam zawk a tih dan ngaihtuah a ni dawn tih a sawi.
Hmun hrang hranga street campaign neihnaah hian K Sapdanga bakah minister zingah Lalthansanga, PC Vanlalruata, Dr Vanlalthlana, ZPM President Vice President C Lalnunnema ten thusawiin, street campaign neihna qard-a ZPM candidate ten thu an sawi theuh bawk.