- Laiu Fachhai
Mizo tawng thiam lo ber leh pai em em tu, he article ziaktu teh lulin Mizo tawng chanchin a han ziak ve khang lang chu, heltu an awm leh ngei ang. Nimahsela a pawi lo. Mizoram State official tawng a ni a, chuvangin sawi thei tur dinhmunah a ding ve e. (English pawh state official tawng tho a ni.)
Hmanlaia Lusei tawng kan tih thin, tuna Mizo tawng tia hriat leh koh ni tawh tawng hi, Pathianin mal a sawm leh a hman mek tawng a nihna leh a lanna pakhat chu, thiam a awl a, hmang theitute an pung zel hi a ni. He article ziaktu pawh hi classroom-a Mizo tawng zir ngai lo a ni a, mahse Mizo tawng hmangin thu a sawi thei a, a ziak ve thei a ni, a tawng pai dan leh ziah dan dik lo awm thin te chu thuhran ni sela. Tin, pianpui tawnga Mizo tawng hmangtute pawh an puitling tawh hle. Hmanah chuan Mara leh Paite, etc te Mizo tawng pai chu pianpuia Mizo tawng hmangtuten nuihza siam nan leh fiamthu thawhna atan an hmang thin a, tunah chuan chutiang chu an ching tawh lo. He article ziaktu hi Aizawl Theological College-a a zirtir ve laiin, faculty meeting leh function-ah te Mizo tawnga thu a sawiin, tawng a pai hle tih chu amah pawhin a inhria. Chutichung pawh chuan a thawhpui professor-te tumahin tawng a pai chu an nui miah lo a, nuihza siamna’n leh fiamthu thawhna atan pawh an hmang ngai lo a ni.
Mizo tawng hi thu ziak leh hla phuahna atan a nalhin a mawi hle a, poem leh poetry (hla chham) phuahna atan pawh nalh leh mawi tak a ni. Zaikhawm (lengkhawm) hla phei hi chu, Mizo (Lusei) tawng hmangtute atanga lo chhuak, Lusei Mizo original a ni. Chuvangin Mizo tawng ngeia han zaikhawm chu, hla a tho thain, lung kuai (feel) deuh bik riauna a nei tlat thin. Mara, Lai, etc ten kan han copy ve pawhin Mizo zaikhawm genre tak tak a pawh pha tlat thin lo.
Chutihrualin, Ralte leh Fanai tawngte Mizo tawngin a lem ral vek tawh ang hian, tunlai Mizoram chhunga tawng dangte, Mara, Lai, Hmar, Paite, etc tawngte pawh hi, Mizo tawng hian lem ral vek thei tur dinhmunah a din tir mek a. Hemi chungchangah hian ngaihdan leh pawm dan chi hnih a awm thei awm e. A pakhatna chu, Mizo nihna (identity) leh Mizo tawng hi zimtea pawm a, Lusei Mizo tawngin Mizoram chhunga tawng dangte a lemral vek tur chu pawi tih loh a, a tha lama thlirtu leh welcome-tute an ni. Mizo hnam leh ram ropui siam tur chuan tawng pakhat chauh neih a tul, titute an ni. He kalphung-in a tum chu hnam khat tawng khat (mono-ethnic and mono-lingua) ram leh hnam siam a ni a, unity in uniformity kalhmang a ni.
A pahnihna chu, Mizo tawng hi nihliap (umbrella) ang chauha hmang a, tawng dangte pawh humhalh a, seilen tir duh, thlir zau leh pawm zau thei tak te an ni. Tawng hlun leh tha Ralte leh Fanai tawngte mah a ral tawh nakalaia, Mizoram chhunga Mara, Lai, Hmar, Paite, etc tawng hlun leh tawng mawi te leh zel a a han ral ve tur chu a uiawm chauh ni lovin, thil tha ber a ni lo ang. Covertly-in (a lang loin) emaw, overtly-in (a lang a pauin) emaw, tawng dangte lem ral (assimilate) duhna a awm phei chuan, counter-productive (inpumkhat lohna) a nih theihna tur kawng te pawh a awm. Chuvangin he hnam bil tawngte hi humhalh a, tihseilen a tul. Mara, Lai, Hmar, Paite, etc te chuan anmahni tawng leh state official tawng, Mizo tawng an thiam kawp chuan a tawk e, tih ngaihdan neite an ni. He kalphungin thlen a tum chu hnam chi hrang hrang leh tawng chi hrang hrangte awmhona, nation of nations Zofate ram ropui leh hnam ropui din a ni a, unity in diversity kalhmang a ni.
A tawng hming hi, Mizo tawng tih ni lovin, Lusei (Lushai) tawng tia hriat leh koh thin a nih ang khan kal chhunzawm ni ta selang chuan, hmanlaia Chin-Kuki an tih thin, he lai vela Tlangmi hnam hrang hrangte hian Mizo nihna an pawm thei vekin a rinawm. Chutichuan Lusei Mizo, Mara Mizo, Lai Mizo, Paite Mizo, Hmar Mizo, etc kan ni hlawm ang a, kan lingua franca (official) tawng atan Lusei/Duhlian tawng kan hmang dawn a ni. Mahse tunah chuan chutiang chuan a kal thei tawh lo. Lusei hnam leh Lusei tawng chu official-in a awm tawh lo a, Mizo an ni tawh. Hnam dangte erawh chu an hming leh an tawngte a la nung rih a, an la hmang rih a ni. Lusei chu Mizo tia thlak a ni tawh a, chuvangin Mizote chuan Mizo chauh an ni a, hnam dangte erawh chu Mizo leh Mara, Mizo leh Lai, Mizo leh Paite, Mizo leh Hmar, etc tiin hnam hming pahnih an kawp a ngai ta a ni. Hei hian practical takin Mizo dik tak tih leh Zohnathlak dangte tih dinhmun a siam tlat thin. Mizo tawng chu pianpui tawnga hmangtute leh Thanga/Thangi hming pu tute chu Mizo dik tak tia hriat an ni bik thin. Siamthat leh theih a ni ang em? Political will a awm chuan, a tlai lutuk lo; siamthat theihna tur hun leh hmun a la awm. Nimahsela siamthat tumna political will erawh a awmin a lang lo. Chuvangin a nihna ang anga in-adjust zel hi kal dan tur chu a ni tawh mai awm e. Chutih rual chuan Mizo tawng hi pianpui tawnga hmang lotuten Mizo ni ve lo anga an insawi hian, Lusei an nih lohzia sawina a ni, tih hriatthiampui erawh a pawimawh hle.
A tawpah chuan, Saptawng (English) hi “Kan pianpui tawng (mother tongue) a ni e,” ti thei tur dinhmuna awm lo hnam tam takin an hmang theuh ang hian, Mizo tawng pawh hi, Chin-Kuki hnam hrang hrangte chuan, “Kan pianpui tawng (mother tongue) a ni e,” an tih vek kher loh pawhin, zirna, rawngbawlna, sumdawnna, hnathawhna, Pathian fakna leh inbiak pawhna tawng atan an hmang hlawm mek a, an la hmang zel dawn a ni. Hei hi a tha (positive) zawngin thlir i tum theuh ang u. Chutih rual chuan mahni hnam bil tawng (mother tongue) chu Pathian pek leh hriatpui tawng a ni tih pawma humhalh duhtute leh tihseilen duhtute pawh dem loin, hriatthiampui zawka zahsak tum ila, an tha tihthoin tihphûr zawk ang u.
Chûng hnuah chuan ka han en a; tin, ngai teh, mipui tam tak, tu ma chhiar sên loh, hnam tin zînga mi te, chi tin zînga mi te, mi tin zînga mi te, tawng tin zinga mi te puan vâr sina tûmkau kengin, lalthutphah hmaah leh Berâmno hmaa ding ka hmu a; tin, chûngte chuan aw ring takin, “Kan Pathian lalthutphaha thua hnênah leh, Berâmno hnênah chhandamna,” tiin an au va.
Thupuan 7.9-10