Aizawl: Aizawl Municipal Corporation (AMC) inthlan lo awm turah Mizoram State Election Commission chuan vote thlak niah polling station leh counting hall-ah mobile phone keh luh a khap.
Mizoram SEC in thuchhuah an siam danin, ngunthluk taka an ngaihtuah hnuah polling officer-te, candidate-te, election agent-te, polling agent-te leh voter-te’n AMC inthlanpui lo awm tura vote thlak ni (April ni 21, 2026) a vote thlakna hmun (polling station building)-ah mobile phone ken luh hrim hrim a khap a. Presiding Officer-te erawh Poll Day Report an pek a ngaih avangin mobile phone silent mode a dahin an ken luh phalsak an ni thung.
Vote chhiar ni, April 27, 2026-ah chuan vote chhiarna hmun (Counting Hall) ah Election Observer-te, District Municipal Election Officer, Assistant District Municipal Election Officer, Municipal Returning Officer-te leh Asst. Municipal Returning Officer-te chauh mobile phone silent mode a dahin an ken luh phalsak an ni a. Counting Hall luh dawnah security duty ten uluk takin an lo check thin ang.
April ni 21-a AMC inthlan lo awm turah political party ZPM, MNF, Congress leh BJP atangin mi 68-in Corporator chuh turin hming an theh lut a. AMC inthlan hi kil li atangin chuh a ni dawn a ni.
ZPM, MNF leh Congress Party ten ward awm zawng zawng (Ward 19) an chuh vek a, BJP-in Ward 11 an chuh thung.
Corporator candidate tura hming thehlut mi 68 zinga 28 te chu hmeichhia niin, INC leh ZPM-ah hmeichhe candidate pakua ve ve, MNF-ah pasarih leh BJP-ah pathum an awm.