Kieran Trippier chuan season tawpa a contract zawh rualin Newcastle United a chhuahsan dawn a, “He hmun hi ka ngai dawn takzet a ni,” a ti.
Kum 35 mi right back hian kum 2022 khan Atletico Madrid chhuahsanin Newcastle hi a zawm a, hun rei tak nomawi la tawh lo club hi season hmasa khan League Cup-ah a champion-pui.
Trippier chuan, “Mi mal tak pawhin, ka hun tawn duhawm leh harsaah pawh, fan-ten min thlawp tlat avangin lawmthu ka sawi a ni. Ka khelhpui te, ka ngai dawn hle mai che u. Zinkawng duhawm tak kan zawh ho a, nangni nena nomawi kan chawi kha, ka career-a ka hun tawn duhawm ber a ni,” a ti a, kum 2021-a Atletico tana La Liga nomawi a lak ai pawhin a ngaihlu zawk niin a lang.
January, 2022-a Magpies-in an lei khan, Saudi Public Investment Fund-in English club a lei hnua an player lak luh hmasak ber a ni a, kum 2023 leh 2025 khan Champions League khel turin a kaipui bawk.