Hun eng emaw ti chhung a reh deuh vang vang hnuah, kumin hian rawn intuaithar leh deuh tumin rilru a seng mek a. Tun dinhmunah chuan engmah sawi chian fak nei lo mah se, rimawi khawvelah a rawn zuan luh thar leh ngei chu a rinawm.
Youth Icon star Melody Lalzirliani hian kum 2024 khan ama pual music video — Mittui a hul ang — a tichhuak a. Nikum khan solo music video chu Project Chawlhna Krista-ah khan — Zinkawng tha ber Isua nen — tih kha tichhuak lehin, Thazual Chart-a pakhatna a hauhna hnuhnung ber a ni ta a. Hemi hnu hian a reh deuh vang ang a. Kumin hian hla thar tihchhuah ngei chu a tum a. Mahse, a hun tur tak hi a la sawi chiang thei tlat lo va. Recording studio-a luhpui theih tur, uluk taka a thlan hla pawh a nei fel tawh a ni.
Durtlang nula zaithiam, Melody hi LPS Youth Icon 2016 khan pali-na dinhmun a hauh phak a. Hemi tum hian Lalthlamuankimi chu Youth Icon atana thlan chhuah a ni nghe nghe.
Youth Icon star a nih hnuah, kum 2021 tawp lam khan, Thazual Gospel Chart-ah palina dinhmun atangin pakhatna dinhmunah a inhlangkai a. Chu a inhlankaina hla chu, a hla hit — Ka tan a tawk reng si — tih hla kha a ni. He hla hi Music Domain Mizoram (MDM) lama a hla hmasa ber a nih piah lamah, Thazual chart-a a hla a lanpui hmasa ber a ni bawk. He hla hi hemi kum, July thla tawp lam khan a tichhuak nghe nghe.