Aizawl: Central YMA hnuaia Central Co-ordination Committee vawi 105-na chu Central YMA Hall-ah Central YMA President R Lalngheta kaihhruaiin an thutkhawmin ro rel inkhawm neih a ni.
Rorel inkhawm tan a nih hmain Arsi Consultancy ten a thlawna Central YMA tana an siam Central YMA Website thar tlangzarhna hun hman a ni a. Website enkawl zui dan tur leh inremna thuthlung ziahna hun hman nghal a ni bawk.
Inremna hi Arsi Consultancy aiawhin T. Infimate, CEO leh Christopher Lalmuanpuia, Business Operation Manager ten hming an ziak a; Central YMA aiawhin President R. Lalngheta leh General Secretary Prof. Malsawmliana ten hming an ziak thung.
Rorel inkhawmah hian YMA Inkhawmpui Lian Vawi 74-na thurel bawihzuina sawiho langsar zual zingah, ‘Mizo hmeichhiaten hnam dang an neih zel loh nan Central YMA-in inzirtirna nasa leh zual zawkin kalpui rawh se’ tih chu hmalakna kalpui chhunzawm zel ni rawh se tih a ni a. ‘Mizoram chhunga hnam dang sumdawng tam ta lutuk hi titlem turin YMA-in hma la rawh se’ tih chu hemi chungchangah hian nasa leh zual zawk a hmalakna kalpui nise tih a ni a, hemi chungchanga inzirtirna thuziak tar leh semchhuahna kawng a hmalak nise tih a ni.
‘Zohnahthlak chi peng hrang hrang Mizoram-a chengte zingah chibil hmalakna a awm tawh loh nan Central YMA in hma la rawn se’ tih chu hmalakna hi kalpui zel ni rawh se tih a ni bawk.
‘Inner Line Permit (ILP) hi tun aia khauh leh awmze nei zawka kalpui a nih theih nan YMA-in sorkarah thlen rawh se’ tih chu chak takin hmalak chhunzawm zel ni rawh se tih a ni bawk.