Aizawl: Champhai Police chuan tun hnaiah heroin gram 100, Rs nuai 20 man hu an man.
April 7 tlai khan Chhungte dai (Chalbawiha Junction, Khankawn Check Gate piah)-a patrolling-ten mi pakhat, kawng sira thu ringhlelin thu an zawt fiah a, Lalbuatsaiha (21), Tlangsam nia insawiin a bul hnim karah ruihhlo a thuhruk thu a sawi a. Heroin gram 48 (hawng 4), Rs 9,60,000 man hu, sarang duma dah hmuh a ni a. Amah bakah mobile phone pakhat man niin Champhai PS-ah thubuai ziah luh a ni.
Chhui zuina atangin inhnamhnawih mi dang pahnih, Lawmnasanga (40), Khawhai khua leh Lalrinthangi (35), Tlangsam pawh man belh leh an ni.
April 6 zing khan Champhai Police, Chalbawia Junction, Khankawn Check Gate-a duty-ten lirthei veivak an endikah sumo (MZ-02B-0743) Champhai atanga Aizawl pana endikin Heroin gram 52, sahbawn bawm pathum leh plastic bawm pahniha dah, Rs 10,40,000 man hu chu a mi chuang pakhat, Lalpekthuama (30), Seling (Bethel) hnen atangin an man a, chhui chhunzawm zel a ni.