Aizawl: Tourism Minister Lalnghinglova Hmar chuan hnam nunzia behchhana tourism hi kalpui an tum thu a sawi.
Nilaini khan Vangchhia Lal Mual-ah PRASHAD scheme hnuaia sak tur Development of Basic Amenities lungphum chu Tourism Minister Lalnghinglova Hmar hian phumin thu a sawi a. “Tourist-te hian kan Mizo zia leh nunphung te hi an rawn hmu chak thin a, chuvangin intihchangkan leh lo inti danglam vak lova tuna an nun dan ang anga khualzinte lo hmachhawn mai chu a hlu zawk a ni,” tiin, hnam nunzia behchhana tourism hi kalpui a nih tur thu a sawi.
Tourism minister hian Vangchhia khuain khualzin an hipna kawngah an khuain an hlawkpui a, riahpui theih tur ngaihtuah a tul tih a sawi a. Chu lam kawngah chuan ngaihtuahna seng tura chahin Tourism Department pawhin theihtawp a chhuah tur thu a sawi bawk.
Adviser to CM Lalmuanpuia Punte, MLA pawhin thusawiin, Mizote hian culture leh hmanlai thil hlu vawn him nachang an hre lawk lo va, thil hlu riral tam tak a awm tawh a. Tunah erawh an changkang ve ta a, Mizo thil hlui te vawnhim a, humhalh an uar chho ta chu lawmawm a tih thu a sawi a. Tunah chuan sorkarin nasa takin tourism lamah hma a la mek a, khualzin tam takin Mizoram an tlawh mup mup ta a. Culture tourism lam kalpui a tul a, tourism minister pawh he mi kawngah nasa taka tan a la chu lawmawm a tih thu a sawi bawk.
Vangchhia Cultural & Heritage Centre tia hming vuah hi Rs nuai 547.32 hmanga sak mek a ni.