Aizawl: Tourism Minister Lalnghinglova Hmar kaihhruaiin Thawhlehni chawhnu khan Champhaiah Hnahsin Kût kalpui zel dan tur leh kût lian chho zel dawnsawn dan tur an sawi ho.
Thutkhawmah hian Tourism Department hotute bakah Champhai Nature Conservancy (CNC), Champhai North Joint VC leh Champhaia NGO hrang hrang aiawhte an tel a. Tourism minister chuan Champhai khawtlang leh mipui tangrualin Mizorama kut lian ber pakhat an buatsaih thei chu lawmawm a tih thu a sawi a. “Mizoram chhung leh pawn atangin Hnahsin Kût chhim tur an lo la kal belh zel dawn a, mikhual an la pung zel dawn. Mikhual dawnsawn kawngah Champhai khawpui inpuahchah a ngai a, a bikin tourism kaihhnawiha eizawngte uar zawka zirtirna pek an ngai,” a ti.
Minister chuan Champhai district chu pi pute hmun pawimawh tamna a ni tih sawiin Hnahsin Kût hmanga Champhai tlawhtuten district chhung hmun danga tourist site an tlawh tel theih nan ngaihtuahna sen tul a tih thu a sawi a. “Hnahsin par leh Champhai district mawina behchhanin Hnahsin Kût kalpui dan herrem hret theih niin a lang a. Chutiang tur chuan inrawtna ngaithlaa sawiho turin kan lo kal a ni,” a ti bawk.
Thutkhawmah hian Hnahsin Kut kalpui mek dana hmasawn ngaihna lai leh, kut hman dan tihmasawn tura kil hrang hrang atanga rawtna awmte sawiho a ni a. A bultan nan Champhaia tourism kaihhnawiha eizawng hrang hrang, a bikin homestay, hotel leh restaurant neitute leh tour guide te chu June thla hmain Tourism Department in training pe se tih a ni. A koh khawm leh ruahmanna siam kawngah meeting-a telte chu mawhphurtu ni nghal vek se tih a ni bawk.
CNC-in a ngen tawh angin Hnahsin Kût buatsaih kawnga thawhho dan tur chungchang pawh tourism department leh CNC aiawhten sawiho nghal a ni a. A buatsaih leh funding kaihhnawih hautak zelah ‘community-based festival’ a nihna bo si lovin sorkar nen mumal zawka thawhho dan tur ngaihtuah a ni. Sorkarin festival a buatsaih dan kalphungte sawiho nghal a ni bawk.