MNF Corporator hluite chuan nimin khan thuthar lakhawmtute an kawm a, AMC Sports Complex, Bawngkawn chungchangah ZPM chuan thu dik lo an thehdarh niin an sawi a, enho an cho thu leh thu dik lo hmanga mipui bum ching tawh lo se an duh thu an sawi.
Corporator hluite chuan ZPM party-in thu dik lo hmanga AMC an beihna thenkhat sawi fiah ve a ngai a. AMC Sports Complex, Bawngkawna mi hi local council leh NGO-te remtihna-a PPP Mode-a agreement siam a ni a, AMC-in fund a hmuh ang zela hna hi thawh tur a ni. A hman man atangin AMC-in 60% leh Bawngkawn khawtlangin 40% chang tur a inrem a ni a, a enkawlna senso erawh chu AMC tum tur a ni a. Management Committee hi Bawngkawn Local Council hnuaiah din a ni a, AMC represent mi pahnih an tel ve chauh niin an sawi.
Social media-a thlalak tar lan chu AMC-in a lak hma a mi a ni a. YouTuber hire-a Bawngkawn West Local Council hruaituten an tihlan lehah pawh hian DPR leh detailed estimate sawi chiang duh lovin an rin thu nen mipuite rilru hruai kawi tumin an sawi leh mai a ni an ti a, MNF corporator hluite chuan, “Hnate hi kum tam tak chhungin fund tlachawp awm dan azira thawh an nih avangin lo lang hlui deuhte awmin fencing post leh fencing net a lo bo nual tawh a. A thar hlima engineer-ten an approve ang ni thei tawh lo thil thenkhat a awm a. Hna thawh danah hian ei rukna leh dik lo taka thawh a awm lo a ni tih hi finfiah kan ngam a, sorkar hian chhui chiangin Bawngkawn khawtlang leh AMC-te nen contractor-te kovin enho vek kan cho a, kan duh bawk,” an ti.
Bawngkawn West Local Council, kum 2025-a din, hruaitu tharte hian an area-a sports complex awm chu anmahni bila enkawl an tum vangin hetiang boruak hi an siam ta em ni tih hi zawhna lian tak a nih thu an sawi a. Ruling party-in remchang lo laa campaign auhla bera an hmang zui phei chu a zahthlak a, tual chhung politics tha lo tak khelhna atana hmang tawh lo tura ngenin inthlana tlin duh luat avanga thu dik tawk lo hmanga mipui bum tum hi ching tawh lo se an duh tih an sawi bawk.