Aizawl mayor hlui, Lalrinenga Sailo chuan Aizawl Municipal Corporation (AMC) leh Lunglei Municiapl Corporation (LMC) ten khawpuia cheng mipuite tana hmasawnna hna an thawhna tur sum ZPM sorkarin a tih-lapse belhkhawm chu Rs 33,96,52,000 lai a tling tih sawiin ZPM party chu khawpui enkawltir tlak an ni lo va, mipuiin an hnawl a tul tih a sawi.
Nilainia Aizawl Press Club-a thu thar lakkhawmtute an kawmnaah MNF General Hqrs. Adviser ni bawk, Lalrinenga Sailo chuan, “Khawpuia cheng mipuite tana AMC leh LMC-ten hna an thawhna tur sum, finance commission ruahman fel vek tawh Rs nuai 3,400 chuang zet chu ZPM sorkarin a ngaihthah vang liau liauin central sorkar kutah a let leh (lapse) vek,” tiin, “Hetiang taka municipality ngaihthahtu leh hrek bettu ZPM hi AMC enkawltir tlak an ni lo,” a ti.
ZPM sorkar hian anmahni sorkarna ngei, LMC-in Lunglei khawpuia cheng mipuite hmasawnna hna a thawhna tur, Finance Commission 15-nain a ruahmansak, kum 2024-25 chhung atan Rs. 9,23,12,000 leh 2025-26 chhunga an hmuh tur Rs. 9,46,80,000, a belhkhawmin Rs. 18,69,92,000 chu hmang thei lova siamin heng sumte hi central sorkarah a let vek a. LMC hian MNF sorkar hun lai, 2023-24 chhunga an hmuh, Rs. 6,35,44,000 bak finance commission sum pek hi an la dawng ve reng reng lo a, ZPM sorkar hnuaiah kum hnih chhung a zawnin an chân tawh tih a sawi bawk.
Mayor hlui chuan AMC-in Finance Commission 15-na atanga a sum hmuh tur, AMC-a MNF sorkarin lehkha pawimawh an chin fel vek pawh, ZPM sorkar hian a tih ve tur, ‘Grant Transfer Certificate’ chu Ministry of Finance leh Ministry of Urban Affairs-ah a huna a thawn loh avangin Rs. 15,26,60,000 chu central sorkarah a let bawk niin a sawi a. LMC leh AMC-ten khawpuia cheng mipuite tana hmasawnna hna an thawhna tur sum ZPM sorkarin a tih-lapse belhkhawm hi Rs. 33,96,52,000 a tling tih sawiin, “Anmahni sorkar siamna ngei LMC pawh ngaihthahtu leh AMC sum hmuh tur pawh certificate pakhat lek thawn duh loh vanga ti-lapse duhtu ZPM party hi khawpui enkawltir tlak an ni lo a. Mipuiten an hnawl a tul,” a ti.
“Municipality-a ZPM hlangin sorkarna an siamna, LMC ngei pawh ZPM sorkarin a enkawl dan atang hian AMC phei chu enkawltir chi an ni reng reng lo tih a chiang a. LMC hi hna thawk thei lovin an siam a, central sorkar thupek anga property tax an lak tur pawh la mumal thei lovin an siam a, 2024-25 chhunga Rs nuai 79 vel an lak khawm ve pawh a hunah an khawn loh avangin a hunah central sorkarah an report hman lo a,” tiin, finance commission sum ruahmansak pawh a zawnin kum hnih chhung an chân phah niin a sawi.
Lalrinenga Sailo chuan, “AMC-a MNF sorkar liam ta erawh kha chuan a tih tur engkim a tifel a, lehkha pawimawh zawng zawngte pawh a tihfel vek avangin finance commission atanga sum lo kal pawh a dawng tha a, ZPM sorkarin a huna AMC inthlanna a buatsaih loh avang leh AMC thuneihna zawng zawng March 1, 2026 atanga ZPM sorkarin a laksak tak avangin 2025-26 bika second installment Rs. 15,26,60,000 chu ZPM sorkarin a tih-lapse-sak ta tho a, second installment hmu tur pawh hian AMC chuan engkim a peih fel a, ZPM sorkar zawkin ‘Grant Transfer Certificate’ chu central sorkarah a huna a thawn duh miau loh avangin Aizawl mipuiten hmasawnna hna thawhna tur sum tam tak kan chân phah ta a ni,” a ti.
Hetiang hi thil awm dan dik tak a nih laia chief minister-in AMC tan sum tam tak an nawr chhuak tih te, AMC-ten an ngawih bopui veng veng a, March 18 khan an hre chhuak chauh a, MNF AMC-te khan Aizawl an lo vei lo hle a ni tih mipui hmaa a sawi duh maite chu thu dik hre reng chunga mipui bum tumna, koham taka AMC thuneihna an inpek thup tumna thil tha lo leh zahpuiawm tak a ni tih a sawi bawk.