Aizawl: April 21, 2026-a Aizawl Municipal Corporation (AMC) inthlan neih tura vote thlakna khawl, Electronic Voting Machine (EVM)-te chu Ningani khan Aizawl DC Pisa Puiah endik a ni.
AMC Ward 19-a inthlannaa hman tur EVM-te hi a hmasa berah endik niin chumi hnuah ward tina polling station-a hman turte endika commissioning neih leh niin EVM-te hi pindan awmkhauhah venhimna khauh tak hnuaiah dah a ni.
EVM randomization leh commissioning neihah hian inthlan buaipuitu election official, observer, returning officer, EVM supervisor-te bakah political party tin aiawhte an tel a ni.
State Election Commission chuan inthlanna tluang tak leh felfai taka nei turin ruahmanna a siam chho mek a, vote thlakna hmun polling station pan thei lo kum lama upa tawh leh taksa hriselna lama harsatna neite tan an awmna hmuna vote an thlak theih dan tur ruahmanna kalpui mek niin, chawlhkar tharah hian home voting hi kalpui tan tura ruahman a ni a, AMC Ward 19-ah hian vote thlakna hmun polling station 364 a awm dawn a ni.