Aizawl: MNF Sr. Vice President Dr R Lalthangliana chuan ration buhfai leh chhiah chi hrang hrang a tihpun hi tawngkam thiam avanga sawi mam chi a nih loh thu a sawi.
Ningani khan Dr R Lalthangliana hian Zotlang (Ward no. 10) leh Thuampui (Ward no. 7) te tlawhin MNF campaign office a hawng a. Hawnna inkhawmah thu sawiin, ZPM sorkarin a let thawka ration buhfai man a tihsan hi AMC area-ah pawh tuartu chhungkua an tam thu te, tui bill, electric bill leh chhiah chi hrang hrang a let thawk te, hmun thenkhatah a let thum/let li laia an tihsan chu mipuiin an tuar hle tih a sawi.
Dr R Lalthangliana chuan, Chief Minister leh Minister/MLA-ten an tawngkam thiam leh an sawi mam thiam vang ringawtin mipui chhiah pek a tlem phah lo tih sawiin, a tuartu leh hre chiangtu chu mipui an nih thu a sawi.
“Tawngkam thiam vang leh sawi mam thiam avangin thil man a hniam phah lo va, bill leh chhiah kan chawi leh pek a tlem phah lo va, sum leng vak a tam phah hek lo,” a ti.
Mizoramah AMC huam chhunga chengte hi politics ngaihven lo pawha khawsa theite awm tamna hmun a ni a, buhfai, ei leh bar, tui, electric, gas leh kawng leh a that a, ei bar an hnianghnar chuan sorkar thaah an ngai mai a, mipui an lungawi mai thin tih sawiin, “Hengah te hian ZPM sorkar a hlawhchham fai vek. Chuvangin, Aizawl khawpui enkawl turin ZPM an tlak loh a ni,” tiin, Aizawl khawpui hmangaih bertu MNF candidate-te thlang tling turin mipui a ngen a ni.