Aizawl: Mizoram tlawha châm mek, Minister of State for Jal Shakti Raj Bhushan Choudhary-a chu Irrigation & Water Resources Department Minister PC Vanlalruata’n nimin khan Lok Bhavan-ah kawmin Mizoram tana thil pawimawh leh mamawhte a thlen.
An inkawmnaah hian PC Vanlalruata chuan Mizoram hian ruahtui dawng tha viau mah se, a dah khawlnate an neih that loh avangin leh tlangram chhengchhe tak an nih avanga tuia harsatna an tawh dante a sawi a. Tui dah khawlna tha zawk, tuikhuahte hmanga irrigation project an neih theihna tura hma lakpui turin union minister hi a ngen a ni.
PC Vanlalruata chuan Mizoramin leihnuai tui verh chhuah project hi tihtawp tumna a awmnia a hriat thu sawiin, he project hi chhunzawm leh a nih theihna turin a ngen a. Tlangram an nih avanga loneitute hnena tui pekna tur rate (cost per hectare) chu Mizoram ang tlangram tan chuan a beitham avangin a bik taka hmarchhakte tan ennawnsak leh turin a ngen bawk.
Chief Minister Lalduhoma’n union minister hnena lehkha a lo ziah tawh, Mat Valley Integrated Project, Rs vbc 274.25, Irrigation & Water Resources Department-in DPR a siam, Bramaputra Board a thawn thlak tawh chu en zuisaka a rang thei ang ber sanction turin a ngen bawk a. Solar pump leh PMKUSUM hmanga tlangram tui pekna rate hniam bikte pawh tihsan turin a thlen bawk.
PC Vanlalruata chuan Mizoram leh tlangram dangte nena hman tangkai tur National Hill Water Security Mission din a, tlangramte tuia harsatna sut kian dan tur ngaihtuah sak turin union minister hi a ngen bawk.
Union minister pawhin Delhi-ah secretary-te lo sawipui a tum thuin a chhang a, hun rem changah Mizorama a enkawltu department-te nen chiangkuang zawk sawihona hun ruahman a tum thu a lo hrilh bawk a ni.