Aizawl: RD Minister Prof Lalnilawma’n Khawbungah Mizo Hlakungpui Mual thawh rukna leh Ruby Jubilee chu khuallian niin nimin khan a hmanpui a. Hemi rual hian hla phuah thiam mi pahnih leh thu ziak mi pali chawimawina lungphun a hawng nghal.
Khuallian Prof. Lalnilawma chuan Mizo Hlakungpui Mual buatsaih a nih theihna tura ngaihtuahna sengtute fakawm a tih thu sawiin, mi nazawng tih theih a nih loh thu a sawi a. Mizo Hlakungpui Muala seng luh thar mi parukte chu lawmpuiin, zahna chibai a buk a. Mi hlawhtlingte lawmpui a, chawimawi tlakte chawimawi zel turin kalkhawm mipui a sawm.
Khuallian chuan Mizo Hlakungpui Mual hi hmun hrang hranga Mizo awmte phuarkhawmtu ni se a duh thu a sawi a. Hlakungpui mual atang hian Mizo te harh thar a, zirna ngaisang thar tur leh thalaite’n tlawmngaihna leh hawihhawmna nun vawng nung turin a chah a. Mizo Hlakungpui Mual hi Mizote hlut a nih zel a, Mizo history zir a nih apianga thai lan a nih zel theihna turin a duhsak thu a sawi a. Lawmpuina Rs 50,000 a hlan nghal.
He hunah hian East Tuipui bialtu MLA Ramthanmawia chu khual zahawm mniin thu a sawi bawk.
Inkhawm hi Mizo Hlakungpui Mual Committee Chairman C. Lalluia’n a kaihruai a. Mizo Hlakungpui Muala sengluh thar chhungte leh sengluh tawh chhungte atangin thusawi ngaihthlak a ni.
Mizo hlakungpui mual thawh ruknaah hian hla phuahtu pahnih – Hawva (1893-1956) leh Lalmama (1901-1959) te bakah thu ziaktu pali – Capt. LZ Sailo (1924-2008), Kawlkungi (1927-2015), Rev. Zairema (1917-2008) leh Lalhmingliana Saiawi (1937-2016) te sengluh an ni a, mi 41 sengluh an ni tawh a ni.