Aizawl: ZPM Thalai General Headquarters chuan chawlhkar tina an kalpui mek, NH-06 kawng siam endik leh vil zuiin nimin khan an thawk chhuak.
ZPM Thalai te hi an Treasurer Lalsangliana Khiangte, General Secretary Jerome Bawlte, CVL Hmudika leh Secretary F. Laltanpuia ten hovin kawng siam mek an enfiah a ni.
Kawng an enfiah lai hian, 4-Lane in a khawih tel loh tur Khamrang – Sairang hi J Infratech Pvt. Ltd. leh BR Goyal Pvt. Ltd ten enkawlin, J. Infratech Pvt Ltd., te hian RCC leh resurfacing an khawih a, BR Goyal Pvt LTd te hian Black topping & Re-surfacing leh RCC an khawi bawk a ni.
Company hotuten an lo hrilh danin, ruahin an hnathawh tikhaihlak deuh thin mah se, tun thla chhung a zo fel thei turin an ruahman a. An enzui zel dawn a ni.
ZPM Thalai General Hqrs Treasurer Lalsangliana Khiangte chuan, “Kawnpui – Sairang kawng Mizoram tana chak lakna kawngpui ber hi ZPM Thalaiten kan vil reng nachhan chu kan ngai pawimawh em em a, Mizoram-a company kawng siam tute hi ZPM Thalai chuan ruling tha chakna hmangin Mizo mipuite duhthusam kawngpui, company-in an siam ngei thei nan a vil kan ni,” a ti.