Aizawl: MNF Sr Vice President Dr R Lalthangliana chuan Aizawl khawpui leh Mizorama hmasawnna zawng zawng hmuh theiha lo lang chhuakte hi MNF kutchhuak deuh vek an nih thu a sawi.
Inrinni khan MNF AMC Election Street Campaign chu Aizawl khawpui chhung veng hrang hrangah buatsaih a ni a. Vaivakawna campaign inkhawmah Dampa bialtu MLA Dr R Lalthangliana chuan ZPM hotuten sorkar hmasain engmah thawk lo angin sawi thin mah se, Aizawl khawpui leh Mizorama hmasawnna zawng zawng hmuh theiha lolang chhuakte hi MNF kutchhuak deuh vek an nih thu a sawi a. “Kan kawng siamah an kal a, kan building sak sa an luah a, department hrang hranga kan lo thawh chhuah tawhte zar an zo mek zawk a ni. Eng thil tha mah thawk chhuak lova min sawi fotute hian Aizawl khawpui leh Mizoram tan eng thil ropui nge an tih ve tawh a, eng ram rotling nge min hnutchhiah tih ka zawt let a ni,” a ti.
“AMC hi Aizawl khawpui lo thianghlim zawk nan te, a mi chengte kan lo hrisel theih zawk nan leh kawng hrang hrangah hma kan sawn theihna turin MNF din leh kut chhuak anih angin, Aizawl khawpuiin hma a lo sawn zel nan MNF AMC official candidate vote tling ngei turin ka sawm takzet che u a ni,” a ti bawk.
Ramrikawna campaign inkhawmah MNF Treasurer Lalruatkima chuan, “ZPM-ah sum nei leh thil tithei an dingchang zel a, miretheite erawhin sawrfu leh tur chuang awm lovin chhiah chi tinreng kan chawi awlh awlh lawi si,” a ti a. Hengte avang hian Aizawl khawpui enkawl tura ZPM chu thlan chi an nih loh thu leh MNF candidate-te vote vek turin mipui a sawm.
MLA Ramthanmawia chu Ramthar/Sihpui-ah, MLA Robert Romawia Royte, MNYF President-in Tennis Court bulah, Er. H.Lalzirliana MLA, Adviser-in Mission Vengthlangah leh MLA Lalrinsanga Ralte chuan Bungkawnah thu an sawi theuh bawk.