Karleh 21.4.2026 maiah Aizawl Municipal Corporation thlan kan hmabak ta. Political party te pawh mawngvawmba ang maiin kiltin an hrut mek. Ward tinah party ten vantlang inkhawm neiin thu an sawi dup dup a. Hetih lai hian mipui lamah erawh inthlan tur hian boruak a la siam tehchiam lo hle.
Party tinin mipui duhzawng, mi hipna tur manifesto an ti chhuak a. Manifesto tluangtlam, kum danga an tih ang tho a ni tlangpui. Manifesto hi kan chief minister hlui Pu Lalthanhawla khan kan inziah that siak mai mai a ni a lo ti tawh a, a lo sawi dik hle in a hriat. Inthlanna a chakna an lo chan chuan an tihhlawhtlin tur ngei thuchhuah, intiamna pawh a tih theih ang chu. Mahse kan political party te hian dan pangngaia an neih avangin a ngai ang deuhin an ti chhuak leh vel mai mai a, han chhiar sak hlawm hian kan political party te ah thil thar a awm lem lohzia tarlannaah pawh a ngaih theih ang.
Kan party te election manifesto-ah ber thil thar, tha zawk ruahmnanna a awm loh chuan kan municipal thlan turah hian beisei a sang lo hle mai.
Khawvel hmasawnna kal chak takah hian a ngai anga kan kal reng chuan midangin hma an sawn mek si a, midang hnungah kan kal tihna a ni a. Tui tling hi a ngai renga a awm chuan bawlhhlawhah a chang thin ang hian a ngaia awm hi a hrisel lo hle.
Kan Aizawl khawpui pawh mipui kan pung zel a. Sumdawnna lamah pawh hma kan sawn a, tunhma a thil awm ngai lo tam tak a awm thar a. Hetiang karah hian kan khawpui inawpnaah pawh hian kan inher rem ve zel a ngai. Tun hma a vei em em ni ngai lo hnamdang sumdawnna a awm thar tam em em a, dan lo anga lang sumdawnna tam tak chu Central YMA pawhin ngaimawhin general conference-ah hial an ngaihmawh thu resolution an pass ta hial. Sumdawnna chungchang hi AMC subject a ni a. Trade license / shop license pawh AMC kutah dah a ni. Anni hi phalna pek chhuah leh control-ah pawh mawhphurtu an ni. YMA ten chuti taka an ngaihmawh, an kuta awm bawk si chu tu party mahin an election manifesto-ah an tarlang hauh lo va. Party te hian tih tak takin an vei lo tih a lang chiang hle. Kan political party te ah hian mipuiin rinna kan tlachham sawt hle a, politics lam ngaihven peih loh phah pawh an tam ta. Kan party te hian heng thu pawimawh hi ngaihvenin Mizo mipui himna atan sumdawnna chungchang hi rilru tak taka veiin an manifesto hi enchiang leh hlawm se a tha hle mai.