Kerala Blasters FC chuan an team tichak tura hma an lak mek zelah Argentine winger Francisco Feuillassier Abalo, Franchu tia hriat lar an la lut.
Kum 27 mi hian Europe-a league hrang hrangah tawn hriat a nei nual tawh a. Real Madrid leh Rayo Vallecano youth system atanga inzir chhuak a ni a, Spain-ah inzir tanin Real Madrid Castilla youth setup-ah a tel thin.
Mar del Plata, Argentina-a piang forward hi Madrid-a a awm chhung hian inelna sangah tawnhriat a nei ve hman a, Segunda División B-ah khelin attacking-a a theihna te a pho lang thin.
Hemi hnuah hian Spain-ah a senior career chhunzawmin Rayo Vallecano, CF Fuenlabrada, SD Eibar leh FC Cartagena club-ah te a khel a, LaLiga SmartBank leh inelna sang dangah te a inlan bawk a. A khelhna hnuhnung ber chu Cyprus-a Karmiotissa FC a ni a, July, 2025 thleng a khel.
Vawi 177 a inkhelh tawhah La Liga 2, Segunda División B, Copa del Rey, Nemzeti Bajnokság leh inelna dangah te goal 16 thunin a thiante tan vawi 19 a siamsak tawh bawk.
Argentine tlangval hi a sir tawn tawnah a khel thei a. Tlar hma hmun dangah pawh chhawr theih a ni a. Ball thunun a thiamna leh hma lam thlenga ball khalh lut thei a ni a, a sir lam atangin team tana danglamna thlen thei a ni.
A tlan chakna leh a chet dan fing takte chuan pakhat leh pakhat inhmachhawnah pawh a hlauhawm a. Hmun chepah pawh a che thei a, amah leh a thiante tan hun tha a siamsak thei bawk.