Aizawl: Mizoram Pradesh Congress Committee (MPCC) chuan ZPM sorkara Mizoram Universal Health Care Scheme (MUHCS) chu thil tha tak anga lang, belhchian dawl lo a nih thu sawiin, Mizoram chhung private damdawi ina MR a bill theih loh chuan Mizoram mipuite zah lohna leh hnam dang duhsaknaah an ngaih thu an sawi.
Inrinni khan Aizawl Press Club-ah thu thar lakhawmtute kawmin MPCC hruaitu Joseph Lalhimpuia chuan, ZPM sorkar chuan MUHCS chu sum tam tak senga inziahluh ngai, Mizoram private damdawi in lian leh medical facilities nei thate mipui nawlpui ban phaka dah lotu a nih thu an sawi a. ‘Deem Empanelled’ hospital siamin cashless lova MR bill theihna, Mizoram pawn hospital te MUHCS atan a approve a, hetianga state pawn hospital te, treatment inang rengah Mizoram chhunga private damdawi inte aia rate to zawk bawk si-ah, MR bill theihna a siam lai a, mipui te ban phak maia awm Mizoram chhunga private damdawi inah MR bill theih loh tlat hi, Mizoram mipui zah lohna leh hnamdang duhsakna dik takah an ngaih thu a sawi.
MNF sorkar khan health care a ngaihthah tih sawiin Congress MLA hlui, Joseph Lalhimpuia chuan, “Bill a tang rei em em bawk a. MNF kha health care-ah an hlawhchham a ni,” a ti a. Congress sorkar laia inziah luh man Rs. 200 leh Rs. 500 kha ZPM sorkarah chuan general Rs. 2500, semi cabin Rs. 5000 leh cabin Rs. 10,000 a ni hem mai a, mipuite hi sorkar hian sumdawn nan a hmang emaw an tih hial thu a sawi a. MUHCS a inziahluh man hi a san em avangin chhungkaw tam tak tan harsatna a thlen thu sawiin, “Mi rethei golden card hmangtute, sum tam tak senga inziak lut ten kan hospital neih that kan pan theih nan private hospital te hi empanelled-ah dah ve thuai turin kan phut a ni,” a ti.
MPCC General Secretary Joseph Lalhimpuia chuan Healthcare scheme chungchanga sorkar hmalaknaah damdawi in hrang hrang nen inremna sum sum chet vel dan thup tlat a ni chu mak a tih thu a sawi a. Mipui sum chet vel dan hriat chu mipui chanvo a nih thu sawiin, “Langtlang sorkar chu democracy zepui a ni. Heng zawng zawng hi ZPM sorkar chuan palzutin damdawi in te nena an inremna zat chu thup bo tlat chu mipui zah lohna a ni. He thilah hian puanhnuai thil, mipuite hriattir an phal loh thil tam tak a inphumru niin a lang a, chuvangin bihchian a tul tak zet a. RTI hmanga zawhna leh Assembly session-ah pawh an pe chhuak thei lo a. Hospital nena thawhhona hi mipui pawisa thawhkhawm hmanga kalpui a nih avangin an thup tlat hi dan kalh a ni,” a ti bawk.