Aizawl: Union of Evangelical Students of India – Mizoram (UESI) chuan State Annual Council vawi 14-na English Congregation, Mission Veng, Kohhran-ah April 9 & 10 khan an hmang.
Evangelical Union (EU) tia hriat lar, UESI hi post-matric zirlaite zinga rawngbawlna a ni a, all India huap a ni. Mizoramah pawh November 22, 1975 atanga tun thleng hian district hrang hranga Higher Secondary School leh college hrang hrangah rawngbawlna an kalpui a ni.
He State Annual Council-ah hian thupui atan, ‘Equip & Enlarge’ (II Timothy 4:5) ‘Rawngbawlna zau zawk atan a inbuatsaih leh inchher hriam’ tih chu thlan niin, inkhawmpui speaker chu National UESI Mizoram State Staff in-charge, P.M Philip a ni.
EU (college zirlai) leh EGF (EU zirlaite enkawltu graduate te) hmun hrang hrang atangin an kalkhawm a, inkhawmpui palai zawng zawng hi mi 150 an ni.
Kum thar 2026-2027 chhunga UESI-Mizoram rawngbawlna tur kawng hrang hrang ruahmanna rorel inkhawm neih a ni. Heng bakah hian kum 2026 -2028 chhunga hruaitu thar turte ruatna hun hman a ni a, chung zingah chuan President atan Upa Dr. Ramdinthara Sailo ruat a ni.