Aizawl: ZPM Adviser B Lalchhanzova chuan ZPM kaihhruai sorkarah mipui an lungawi niin a sawi.
Inrinni zing khan AMC inthlan lo awm tur atan Aizawl West III ZPM Block buatsaihin Maubawkah street campaign inkhawm neih a ni a. Inkhawmah hian ZPM Adviser B Lalchhanzova chuan ZPM kaihhruai sorkarah mipuite an lungawi a, sorkarna siamtu leh a neitu an nihzia an hrechiang hle tih a sawi.
Supply Minister ni bawk B Lalchhanzova chuan ZPM sorkar chu sorkar lai ngeia inhmuchhuaka theih tawp chhuaha hma la nghal char char an ni tih sawiin, “Sorkar kal tawhte kha chu an tlak hnuah an harhchhuak thin a, thil tha tih an duh thar thut thin,” a ti.
AMC liamta MNF sorkarna khan Aizawl khawpui hmasawnna tur an vei tawk lovah puhin B. Lalchhanzova chuan, a ngaihna hre tur leh sorkar lai rawngbawlpui theih tur AMC siam a ngai tih a sawi a. “AMC thar lo piang tur hi ZPM sorkar a ni dawn a, mipuiten ngun taka ngaihtuahna seng chungin vote thlak ang u. Mipui nin khawpa ram lo sawp tawhte kutah sorkarna hlan ngam a ni tawh lo,” a ti bawk.
B Lalchhanzova chuan eptu party-te hian au hla thar an nei tawh lo va, engtin nge ZPM an sawisel ang tih hi an ngaihtuahna lian ber a ni a. ZPM chuan ram a vei a, an auhla hi a ngai reng dawn bawk. Chuvangin ZPM an vote hian thil tha an beisei tihna a ni a, ZPM hi mipui lamtang a ni a, Ward XV mipuite, ZPM candidate VL Zamlova lo vote vek turin mipui a sawm.