Aizawl: Tun hnaia Mizoram hmun hrang hranga Department of Zoology, Mizoram University-a Developmental Biology & Herpetology Lab., researcher-te chuan Murlen National Park atangin rul chi (species) thar hmuchhuakin a hmingah Murlen hmingchawiin Herpetoreas murlen tiin an vuah.
Hetiang rul, Herpetoreas genus hnuaiah hian khawvel pum huapah species paruk (Herpetoreas burbrinki, H.palealii, H.platyceps, H.sieboldii, H.tpser leh H.xenura) awmin, India ramah species pali (H.palealii, H.platyceps, H.sieboldii leh H.xenura) te hi hmuhchhuah tawh an ni ve thung.
Species hmuhchhuah thar tak, Herpetoreas murlen hi tur (poison) hlauhawm nei lo chi ‘non-venomous’ niin a pianphung leh DNA zirchian hnuah species thar a ni tih German Herpetological journal Salamandra chuan May 15, 2022 khan a rawn tlangzarh (published) ta a ni.
Prof. H.T. Lalremsanga chuan, “He rul hmuhchhuah thar nen hian Mizoramah rul chi hrang hrang species 63 hmuhchhuah ni tawhin he rul chi thar hi hmun zo leh sang, tuipui zawl atanga 1700 m chung lam vek atanga hmuh niin, Murlen National Park ngaw pilril chhung, khua atanga zanriaka kea kal ngar ngar ngaihna hmun a ni. He rul danglamna pakhat chu an laichin hnai tui awmna hnai a khawsa chi, Herpetoreas species dangte ang lo takin tui awmna hmun atang a hla tak takah hmuh an ni. Hemi research kalpuina permit min petu, Dept.of Environment, Forest & Climate Change chungah kan lawm takzet a ni,” a ti.