United States-a Texas-a primary school-a silai keng mi pakhat chetnaah chuan thil thleng lai hmutute chuan police-ten an luhchilh mai ngam lo va, luhchilh tura nawr an ngai niin an sawi a. Pakhat phei chuan amaha tih mai a duh hial niin a insawi.
Texas thuneitute chuan silai hmet puaktu ber, Salvador Ramos-a hi Uvalde khawpuia an kah hlum hma hian darkar khat vel lai a che hman niin an sawi.
Silai a hmeh puahnaah hian naupang 19 zet leh puitling pahnih an thi a, mi 17-in hliam an tuar bawk.
Thil thleng hmutu pakhat, Juan Carranza chuan Associated Press hnenah hmeichhiate officer-te chu lut turin an au nasa hle niin a sawi.
An chenna in kawt atanga Robb Elementary School-a inpawng kahna thleng hmutu, kum 24 mi hian au nasa hle mah se police-te chu an lut chuang lo niin a sawi.
A fanu an kah hlumsak, Javier Cazares chuan ‘police-in engmah an tih loh avangin’ amah ang bawka thlir vetu dangte hnenah chuan anmahni zawk luh mai a rawt niin news agency a hrilh bawk.
Thuneitute erawh chuan silai hmet puaktu hi classroom-ah a inkalh hnan tlat a, va pawh mai theih a ni lo niin an sawi ve thung.
Texas Department of Public Safety-a director, Steven McCraw chuan Nilainia thuthar lakhawmtute a kawmnaah dan kengkawhtuten an kah hlum hmain silai hmet puaktu hi sikulah hian minute 40 atanga darkar khat vel a awm hman niin a sawi.
Mipuiin dem mah se US Border Patrol Chief Raul Ortiz ve thung chuan officer eng emaw zahin silai kah hi an hmachhawn a, an tih tur an ti theuh niin CNN hnenah a sawi ve thung.
“Classroom-ah an lut a, rang takin thil thlen dan enin an tihtheih ang ang an ti a ni,” a ti.
Silai hmet puaktu hian hetianga a chet hma reilo teah hian social media-ah a thiltih tum hi a tar lang hman bawk nia sawi a ni lehzel a, hei hian thuneitute demna a titam zual.
Texas Governor Greg Abbott chuan Ramos-a hian sikul a beih hma darkar chanve lekah a pi kah hlum a tum thu chu private message hmangin a thawn darh niin a sawi.
Message a thawn hnuhnung, sikul a beih hma minute 15 lekah elementary school beih a tum thu pawh a thawn darh leh bawk.
CNN-in a tar lan dan chuan private message a thawn hi Germany-a tleirawl kum 15 mi, online-a a biak thin a ni.
Facebook neitu, Meta chuan ‘mi mal inbiakna’ chu a nazawngah en ngai ni lo mah se hetiang thil lungchhiatthlak lutuk thlengah hi chuan hai chhuah theih a ni tih an sawi a. Thil thleng chhuitute nen an thawkho reng tih an sawi bawk.