Hmeichhe tan chuan sam sei hi a lo mawi ber zel mai. Thenkhatin sam zuah sei an uar laiin, thenkhat chuan an titawi veleh a.
Sam hi hmeichhe mizia a lanna pakhat a ni ti ila, a dik mai awm e. Hmeichhia, sam sei leh ngil mam tha tak nei chu a tlangpuiin an nun pawh a ngil a, an tluangtlam deuh nge nge, niin an sawi hial.
Nu pahnih khatin an sam an lo zuah sei viau chuan mak pawh kan ti hran lo. Mahse, a khaw pumpuia sam sei hlir awm khawm hi i hre ngai em? A mak dangdai ve riau a nia.
China ram Huangluo Yao khuaa mite chuan sam sei hi hrisel nan a tha nia ngaiin, an hmeichhiate chuan sam an nei sei thei hle.
He khuaa hmeichhiate hian sam an nei sei tlangpui a, ft 3 atanga ft 6 te hi an ni deuh vek hlawm. Hetiang an nih avang hian Guiness Book of World Record ah sam sei awm khawmna khua nihna an lo hauh daih tawh a ni. An khuaa kal ve i duh chuan China chhim lam Guilin khawpui atangin, motor nen darkar 2 vel lekah i thleng thei ang.
Huangluo Yao khua hi Jinsha lui kama awm niin, a mi chengte hi hmanlai China lal Qin lalte’n ram an awp lai atanga an thlah kal zel, thing-tlanga khawsa te an ni a. A khua hi In 80 chuang an awm a, mihring 600 emaw vel an awm a ni.
An danglam ve na pakhat leh chu an hmeichhia (nula) te hian pasal an neih hmâ chuan an sam hi an tilang zen zen mai ngai lo hi a ni. An tuam a, an thukru tlat zel. Nula thiang-hlim, pasal la nei lo an nih entirna atan an hmang a ni ber.
Yao hnam chuan an sam chu an hnam nen inzawmna nei tlatin an ngai a. Nau tê, hmeichhia an neih chuan ni 100 a tlin veleh a sam an meh sak a. Kum 18 a nihin vawi khawt an meh sak leh a. Chumi hnu ah an sam an met leh tawh ngai lo. An chanchin sawitu thenkhat chuan an sam hi an damchhungin vawi khat chiah met angin an sawi bawk.
Hetianga an hnam culture-a bet tlat a nih avangin an sam a sei thei hle a. Khawvela sam nei sei ber khua tiin 2004 khan World Record an lo siam tawh a, tun thlengin, a khua ang chuan tuma’n an la khum thei lo va, eng tikah mah an khum thei dawn lo, a tih theih ang.