- Mahmuaka Chhakchhuak
He Lehkhabu hi kumin kumtir lama tlangzarh a niin a bu kawm thlalak ringawt phei chu social media lamah pawh ka hmu fo tawh bawk. Ka chhiar chak zawng a nih leh nih loh pawh ka hre chiah chuang lo nain he lehkhabu hian min rawn hnaih zauh zauh tawh a: A hmasa berin MAL meeting kan neihna hmunah kan thianpa pakhat hian a rawn keng a, ka lo bih thuak thuakin a thopazuan deuhin ka lo keu deuh pawr pawr tawh a, nimahsela ka lei ta lem lo. Hmanni lawkah Convention Center, Lungleiah zawrh chhuah leh a niin a ziaktu ngei pawh hmaihmaa ka hmu a, ka keu leh pawr pawrin ngaina takin ka chul vel a, nimahsela ka lei leh lo a. Hetianga awh hmel deuh si a, ka lei loh chhan hi ka hre chiah lo a, sum leh pai ka neih loh vang chu a ni chiah chuang loin ka ngaina tawk lo pawh a ni mai thei e. Nimahsela zan khat chu damlo awmpuipa khum bula ka thutpui lai hian he lehkhabu bawk hi ka bulhnaiah alo awm leh a, lehkhabu dang chhiar tur a awm bawk si loh avang chuan ka han chhiar leh ta mai mai a, a neitu chuan ‘Kha lehkhabu kha i nei tawh em’ a rawn ti a, kei chuan ‘la nei lo e’ ka ti mai a, a ni chuan chutia ila neih loh chuan bu hnih ka nei tho a, tuna i chhiar lai kha ka pe ang che, hawn daih rawh a ti ta mai a, ka ngainat zawng a ni vak lo chung chuan ka lawm hle a ni.
Zan dar 10;00 velah In ka hawng thleng a, inah chuan thlahdah taka thu chungin ka chhiar nghal a, hetih laia ka rilrua awm ber chu: Ka lehkhabu ngainat zawng tak ni kher lo mahsela ka chhiar chhuak hrim hrim ang tih hi a ni a. Thuhmahruai atangin ka chhiar a, ka chhiar zel a, phek tam ka chhiar hma chuan a ziaktu rilru pu phak ang dawn dawnin ka inhria a, ka tui ta telh telh mai a, dar 1;00 ka thleng hial ta mai. A bu hming hi dangdai ka ti a, nimahsela a ziaktu ngeiin thuhmahruaiah he lehkhabu hminga a hman chhan ka han chhiar chuan a awmzia ka hrethiam mai ni loin lehkhabu hminga hman awm tak a ni pawhin ka hriatpui a. Ka dawhkanah chuan MAL, Jt. Hqtr. Lunglei ho buatsaih KIRIRUM tih bu pawh ka dah reng bawk a, chu lehkhabu hming pawh chu dangdai ka ti hle bawk a ni. Tichuan Rohminga FANGFAR chu ka chhiar tui telh telh a, a bu kawm hnung lama a ziaktu thlalak lian vak loa awm lah chu ka bih sek lehnghal a. Hmeltha ka tih vang a ni lo a, ziak thiam ka tih vang lah ni chiahin ka hre lo a, ziak taima ka ti a, ka chhuan vang a ni ber awm e.
Sawi leh lawk ila, a ziaktu Rohminga hi Lungleia a rawn kal khan Pu B. Lalthangliana motor a rawn khalh sak niin ka hria a, nimahsela kan lo hmuahna hmunah a hmel a rawn lang reng reng lo mai a, chibai hman pawhin a awm lo a, khawilai hmunah emaw alo tlanbo daih ni tur hi a ni. Convention Centre-ah ngei pawh chuan Paper buatsaihtu zinga tel mah nisela a thu hle hle thei meuhin ka hre lo a, mi harhvang tha tak ni turah ka han ngai nghal ngawt a. Chuti chung chuan a lehkhabu erawh chu a ngaihnawm satliah lo a, belhchian a dawl riau a, mi danglam tak zawng a nih hi maw le ka ti rilru a. He lehkhabu hi a vawi khat tihchhuahna a nih avang hian a uluk hle tih pawh a hriat a, mahni insitna nei lian mi ve bawk a niin ka hria a, he lehkhabu chhunga thu dah luh tur pawh hi a thlang uluk viauin ka hria. Phek hmalamah hian Dr. C. Lalawmpuia Vanchiau-in Duhsakna thu a ziak a awm bawk a, ani hi kan la inhmelhriat lutuk lo nain Aizawl-a ka kawmthlanga awm a niin RAMBUAI LITERATURE lehkhabu a ziak ka chhiar tawh avangin mi namai lo tak niin ka hria a, ka mi ngainat zawng tak a ni.
Rohminga hian he lehkhabuah hian tunge a nih tih a rawn inpho chhuak tha hlein ka hria a, amah hi Govt. Aizawl North College-a Asst. Professor a ni tih chu hre tho mah ila chu lam chu a nitin hna a niin a eizawnna a nih bawk avangin amah hriatchianna atan chuan a tling zo kher lo ang. He lehkhabuah erawh chuan Rohminga tak tak zawk, mi tam takin an hriat loh lai leh a thinlung chhung ril tak tak zawk a rawn phawrh lang a, a bul atanga a tawp thlengah hian Rohminga hi tunge a ni tih fiah takin a rawn inpho chhuak a ni. He vang tak hian alawm, ka chhiar laia a bu kawm hnunga a thlalak hi ka bih fo ni. Hetiang lehkhabu hi mi nazawng ziah chi ni pawhin ka hre lo a, mi bik leh mi taihma fal tak lo tan chuan ziah ve mai mai chi pawh a ni hek lo. Rohminga erawh chuan a ziak tlat si a, a lehkhabu chhiar zau dan tur ka ngaihtuah hian ka chhuang ta em em a ni.
Phek hmaa berah hian A chhunga thu awmte tiin he lehkhabu chhunga thu awmte hi hlawm lian tak tak Parukah (6) a rawn then a, chung hlawmte chu thupui a pe vek bawkin tawngkam dangdai tak tak a rawn hmang hlawm bawk. Heng a tawngkam hmante hian a ziaktu taihmak zia a rawn pho langin kei ka hre tlat pek a: Chik chetna chimlim a han tih leh Zawltu zaihla tihte phei hi a ziah lai hian thildang reng ngaihtuah loin a thinlung zaah za a pek ngei pawh a rinawm hial. Heng thute a ziah lai hian a kianga awm ni ila, rilru sawrbing taka a ziak lai hmuhnawm tur zia hi ka han mitthla a, a suangtuahna sawrbing nasat tur zia leh a ruk taka a mitmenga lawmna leh hlimna a neihte hi a hmuh theih ngei pawh ka ring a ni. Chuvang tak chuan alawm he lehkhabu hi lehkhabu ro tling a nihna chhan tak pawh hi ka ti lo thei lo a ni. Duhsakna thu ziaktu Opa Vanchiau hian ‘He lehkhabu hi mimal lehkhabu chhuaha hla chi hrang hrang zirna, critical studies tamna ber pawl a nih a rinawm. Run lui kan hmaa pi pute ‘Thuthmun zai’ atangin bul mi tanpui a. Kan hla-kungpui rual, heng: Sialsuk Laltanpuia te, Khawbung Damhauhva leh Awithangpa te, Rokunga leh Zikpuii Pa teho bakah Vulmawi Butta leh Tribal Power Opa hlate, Lallianmawia Pachuau hlate kil hrang hrangin min thlirpui a, LT. Muana leh V. Lalhmunmawia hla te tiamin. Thangthar rimawi khawvela thawm nei lian tak K. Hminga hla pathum chikchetna kan hmu bawk tia a ziak hian he lehkhabu chhung thu chu a sawi kim ber awm e.
A dik chiah a, he lehkhabu ziaktu hian chikchet takin thil hrang hrang a ziak a, chhiar a nuam a, a bengvarthlak satliah lo a, a ziak ngaihnawm em em bawk a ni. Lallianmawia Pachuau hringnun hlimthla tih hmanga a rawn ziak te hi chhiar a nuam hle. Kum 24 mi chauhin heti taka zofate zinga hla mawi leh nalh alo phuah thei hi ava hlu tak em ka ti a, a hla phuah chhante lah a ngaihnawm em em hlawm bawk si. Kum 2012-a Hla Kungpui Mualah ngei mai a ziaktu hian Paper a buatsaih a, L. Keivom te hma meuha a han ding chhuah dan a ziak hi ava han ziak ngaihnawm kher em aw. Ekhai, a bu chhung thu lam chu tun atan chuan sawi vek tawh lo mai teh ang, kan tui lutuk dawn e. A bu ngei hi lo chhiar ve zawk la, i chhiar chhuah vek hnua a ziaktu hnena lawmthu sawi i chak lo a nih chuan nangmahah eng emaw dik lohna a awm a nih ngei ang.