India ram hmun hrang hrangah Pathianni khan ruah tam tak a sur hlawm a, khawlaia tui tlingin lirthei leh mihring vei vel tur pawh a khaihlak phah nual.
Maharashtra, Punjab leh Rajasthan hmun thenkhatte chuan tui lian dinhmun an hmabak mek hlawm a, tual chhung mitetana harsatna lian zawk a thlen rin a ni.
Maharashtra-ah hian Gadchiroli district hmun thenkhatah lui eng emaw zat chu a kuang a luang liam niin news agency ANI chuan a tar lang a. Kundalika lui chu hlauhawm chin chhinchhiahna chunga luangin Amba, Savitri, Patalganga, Ulhas leh Garhi luite pawhin he chhinchhiahna hi an tawk pha teuh tawh hle hlawm.
Haryana-a Ambala-ah chuan kawngpuiah tui tling a tam lutuk avanga harsatna a thlen avangin tual chhung rorel khawlin motor pump hmangin tui an paih kâm.
India Meteorological Department chuan a hmain Pathianniah hian Punjab leh Chandigarh-ah hian ruah tam tham tak, mm 64.5 atanga mm 114.5 inkar a sur thei tih an lo sawi lawk tawh a; khawpui ri leh tek nasa tak tla theiin an sawi bawk.
Rajasthan-a Dholpur khawpuiah pawh a sira Chambal lui lar tak chu a kuang a luan liam avangin khawpui chhungah tui a tling nasa hle.India rama ruah sur duh hun lai ber intan
India rama furpui hun, summer monsoon an tih mai hi kum tin June leh September thla inkara thleng thin a ni a. Hei hi ram chhung khawthlang leh lailite chuan kum khat chhunga ruah an dawn zawng zawng zinga 90% vel zet an dawn hun a ni a, chhim leh hmrthlang lamten 50%-75% vel an dawn hun a ni bawk.
Furpui lai hian India ram pum hian chawhrualin ruahtui mm 200-300 vel a dawng thin a, a tam ber hi July leh August-a sur thin a ni.
Furpui thlen hun hi khawvel sik leh sa inher danglam hret hretah a thlen hun hma emaw, awh rei emaw a awm ve zauh zauh thin a. Kum 1996 pawh khan June 30-ah ram pum a tuam chhuak hman a, hei hi a nih dan thin pangngai aia chawlhkar hnih zeta hman a ni.
A chuang chuan awh rei chang a nei thin a; mahse, hriat theih chinah October 11 hnu lam thlenga fur ruah tla erawh a la awm lo.