Manipur Chief Minister N Biren Singh chuan an state chhunga police-te chu ruihhlo kaihhnawih thil tha loa an inhnamhnawih a nih chuan bân an nih nghal tur thu a puang.
Imphal-a damdawi cheng maktaduai 34 man hu vel halralna hun an hmannaah chief minister chuan a sawi a. MLA-te leh police officer sang tak takten an telpui a ni.
Dan phal loh damdawite hi man an nihin a dah thatna tur indaih lohna avangin court-in hal ral phalna a pe thin a. Chief Minister Biren Singh-an a halral tak damdawite pawh hi Narcotics & Affairs of Border (NAB) leh Manipur police-ten Ningania an mante an ni.
Biren Singh hian an state-a thingtlang miten damdawi siamna poppy huan an neih chhung chu a tihchhiat hna an thawk zel dawn tih a sawi a. An state chhunga damdawi kaihhnawih thila inhnamhnawih police-te thubuai 40 chuang a awm mek bawk niin a sawi.
Chief minister hian sorkarna an siam kum 2018 atang khan ruihhlo do hna an thawhna leh kum tin June 26-a International Day Against Drug Abuse & Illicit Tracfficking-te chu a pawimawh hle tih sawiin ‘tumahin an pumpelh thei lo’ a ti.
Ruihhlo man zingah hian heroin (kg2), ganja (kg273), WY strip (1,22,696), SP capsule leh 530 N-10 tablet a tel.
Hei hi Manipur sorkarin a tum thumna atana ruihhlo a tihralna a ni a. November 30, 2017 khan maktaduai 45,000 man hu vel ruihhlo tihral a lo ni tawh a. September 26, 2018-ah pawh maktaduai 20 hu vel tihral a ni bawk.