Hachhek Bial Kuhva Chingtu Pawl (HBKCP) chuan dan loa kuhva sumdawnna avanga an harsatna tawh mekte sut kian a nih theih nan dan leh thupek khauh zawka kengkawh turin Home Minister Lalchamliana hnenah nimin khan ngenna lehkha an theh lut.
HBKCP hian an bialtu MLA Lalrindika hoin home minister hi kawm an tum a; mahse, a awm remchan loh avangin a PS-in a lehkha tur chu a lo dawnsak a ni.
Hemi hnu hian H Lalengmawia, Commissioner & Secretary, Home Department chu a pisaah an kawm nghal a ni.
H Lalengmawia hian Hachhek biala kuhva chingtute harsatna chungchangah Mamit bawrhsap be nghalin a theih anga ranga hma lo la a, bawrhsap level-a chin fel theih a nih chuan hma la thuai turin a chah a. Kuhva chungtute harsatna chu ching fel turin hma lak zel a tum thu a sawi bawk.
HBKCP chuan Mizoramin dan loa sumdawnna hrang hrang kalpui thin titawp tura dan pangngai anga hma la a, dan kenkawh a nih loh chuan, “Kan dan hi kan hmang zel ang,” an ti a ni.
HBKCP hruaitute hi bialtu MLA bakah Hachhek Constituency Development Committee (HCDC) hruaituten an tawiawm.