- Lallunghnema, Charity Lodge
Consumer Huang min hlutsaktute in zavaiin chibai tha ber ka buk a che u. Duhsakna pawh ka hlan nghal mawlh mawlh che u a ni. Kan awmna hmunah theih hian consumer right hi i tlangaupui zel ang u. Mi thiam leh thiam lo thawh theih vek a ni e. Mi thenkhat chuan Consumer Huang avang hian Zozam Times ka lak phah an ti tlat a. Chutih mek lai chuan consumer right hriat loh chu sawi loh eng maha ngai lo hi an la thahnem em em mai thung a.
Nitin, ni chhuah atanga ni tlak thlenga harsatna tawk hi kan insul zut zut thin a. Thenawmte dawr thil kan lei atang rengin thil man mumal lo thin kan lei a, buk tling mang lovin mamawh kan lei thin. Kawmchhak lawk a mi inbualna sahbawnte, insukna sahbawnte kan lei a. Biscuit chi hrang hrang kan lei bawk. Kan piah lawkah chhangthawp chi hrang hrang, a siam ni leh thla lang reng reng lo te lamin kan lei bawrh bawrh thin a. Hetiang mi te hi consumer fing leh fing lote kan ni.
Consumer fing chuan thil kalphung a hria a, rules, regulation leh mamawh te chu hriat tumin a zir thin a. A thil leiah a fimkhur hle thin. Pawisa a phawrh zen zen lova, tul lem lo leh mamawh lem lo a lei mai mai ngai hek lo. Dawrkai leh sumdawngte a hlau ngawt ngai lova, zah tak chungin an thil a leisakin a hmang thin a ni. A thlawna dawng leh hmu a nih lohzia a hriat chian avangin dawrkaite namnul mai mai turin a bazar ngai hek lo. Amah tel lo chuan an awm thei lo tih a hriat avangin dawrkaite leh sumdawngte a hmuhsit chuang lova,an hmuhsit turin a awm ngai lova, a dinhmun pawimawhzia hriain awmze nei takin pawisa a hmang thin. Ram economy siam liantu leh tithang liantu a nih avangin thil lei leh hman thuah uluk takin a bazar thin a ni. Pawisa hlutna a hai ngai lova, cheng khat pawh hian kawngro a su thin tih a hriat avangin renchem takin bazar hmunah thil a lei thin a ni. Uluk takin bungraw chhinchhiahnate chu a belchiang hmasa thin a ni.
Hetih lai hian sumdawng fing leh sumdawng â an awm a. Sumdawng fing chu a fel, a tha, a ngilnei bawk. Mipui hmakhua a ngai thin. A finna chu hlep a ni a. A dinchhuahna leh hlawhtlinna bul chu a finna chu a ni. Tichuan, consumer fing leh sumdawng fingte zar a nung leh che kan lo ni mai mai a. Heng mihring chi hnihte hi awm lo se, kan chhe vek tawh tur a ni a. Kan vannei ngawt mai.
Tukkhat chuan kei Eva-i pu hian ka lehkhabu ziah hnuhnung ber consumer 2020 for awareness tih chu Sailulak lama kan thianpa Pu Zaitea 10 vel ka va thawn a. Chutia maxi cab – a chu lehkhabu ka thawn dawn lai tak chuanthil ropui tak a thleng a. He sumo driver hi lehkhabu phurh hah man chu pek ka han tum a, a la duh ta reng reng lo mai a. Hetiang hian ka be hram a.
Keimah : Tunge i hming?
Driver : Puia ka nia.
Keimah : I va ti ropui ve!
Driver : Ka pui che a ni mai. Eng tham mah a nih loh kha.
Keimah : Ka lawm hle mai. Mi dangte tana malsawmna i ni hawt e. Lo ni zel rawh.
He driver hi a fel hle a ni. Hmel hriat ngai loh min pui duh a! Thil lian tham a ni lo nain ka lawmna erawh a sang hle thung si a ni. He mi tuka ka thil tawn leh hriatte hi ka'n sawi chhuak law law ang e..
Khatia Zarkawt, kawt thlera ka lehkhabu phurtu motor ka vai liam hnu khan Power House lamah chhuk zelin Bus Stand bul kawng sirah thawk lain ka dung muangmar vel a.Helau velah hian secondhand kamis cheng 50 atanga za inkar hi an lo bawr uih luih mai a. Khawnge, tiin kan en ve ngawt pek a. Mahse, ka en ve a ni mai e. A tlawm a, a tha viau keini ang mi rethei tan a tha viau mai. Mahse, ka dul hi a lo lian ve deuh a, ka tawt ti tih deuh zel a, ka thing(lei tihna-llh) ta lo a ni. Nikum hmasa lam khan cotton jean kekawr tlawn hak thum zet Rs. 200/- in ka lei tawh. Coat lum fual lam deuh 'winter coat' a ni mai awm e Rs 50/- in ka thing tawh bawk. Ka rual pawl dan hi a ropui lo khawp.
Ka haw a haw hun ta a, city bus-ah ka chuang a, chuang tih lemah ka ding law, ka thu a ni. Bus chhunga driver seat vei lam(thlang lam) ah chuan chiang ang reng taka thu ziak hetiang hi ka hmu a. Han chhiar teh u. A tha tiah tiah a nia. ‘RILTAM LEH EI TUR MAMAWH TUTE TAN BAG CHHUNGAH HIAN EITUR A AWM E — TS FAMILY.
Bus driver seat hnunglam daidanna bangah hetiang hi ka hmu bawk. Pianphunga rualbanlo leh kum 80 chin chunglam leh mitdel, kutbul tan chuan man(fare) a awm lo. — TS FAMILY CONT — 8974242 — MZ 01 T — 8262. A thlum dup dup khawp mai. Khami tuka conductor kha bus neitu a nih hmel a, ka han bia a.. Ti tha ka tih thute chu ka han hrilh ve bawk a ni. Ka bul a nu pakhat kha thla ka laktir a, ti hian ka rawn chhawp chhuak a ni.
Hetianga driver fel tak leh bus service entawn tlakte hi keini consumerte tan hlei hlei hian malsawmna an ni chiang hle a. Entawn tur min pe a nih hi! Anni Service provider tha mi chi hnihte hi kan khawvel tinnuamtu an ni.
Tun tumah hian consumer case thu hla ka ziak ta lo. Chhuak lehah chuan mipui hriat atana tul leh pawimawh ka ziak ziak leh ang.Landmark Judgement pawh a ni ang.Mitin mamawh ngawih ngawih consumer right a ni si a..He Huangah hi lo hmaih suh ang che. Thurawnte pawh min pe thei in awm chuan lawmtakin ka lo ngaihven ang. Consumer te lal lohna din ai chuan consumer te lalna khawvel hi din ila, a nuam zawk em em dawn a ni.