Myanmar atanga dan loa Mizorama bungraw lak luh zinga kuhva chauh mal do bik an duh lohzia lantir nan Champhai District Lirthei Inzawmkhawm Pawl (CPDLIP)-in ni ruk chhung chu Myanmar atanga dan loa Mizorama bungraw lut tur zawng zawng leh Champhai atanga chhuak turte an dang tawh.
Myanmar atanga bungraw lut tur an dan chungchangah hian sorkara minister-te atangin dawrtu an la nei lo tih CPDLIP President Liantluanga’n The Zozam Times a hrilh a, Champhai district chhunga MLA pathumte pawhin thawm an la nei lo hrim hrim tiin, MLA-te an ngawi reng chu an hriatthiam har an tih thu a sawi.
An thil phut chungchang sawi zawmin, Liantluanga chuan, Myanmar atanga dan loa bungraw lak luh chungchangah bungraw thenkhat zalen taka a kal theih laia kuhva bik mal do a nih chu an duh lo tih a sawi a, “Dan loa lut rau rauah hian thlei bik awm loin ang khat vekin khaw tin a kal thei se kan duh,” a ti.
Mizorama bungraw lut tur an dan zinga a tam ber chu thei leh thlai lam a nih thu a sawi a, bungrua an dan kawngah hian sumdawngte nen innawr buaina an la tawk lo.
Myanmar atanga bungraw lut tur an dannaah hian thil hmuh chhuah an nei a, dan loa bungraw lut sumdawnnaa inhnamhnawih tam zawk chu mi rethei tete an ni tiin mi harsa zawkten ei bel berah an lo hmang tih hi a lang chiang hle tih a sawi bawk.
Liantluanga chuan sorkar chu dan loa bungraw lut chungchangah an dinna tichiang se an duh thu a sawi a, phut an neihte tihhlawhtlin a nih hma chu an dan chhunzawm zel tur thu a sawi bakah an pawlin hma an lak chhunzawm zel dan tur chu Thawhlehniah CPDLIP Executive Committee-in a rel dawn tih a sawi bawk a ni.