District Horticulture Officer Office, Kolasib district leh Kolasib District Dragon Fruit Association hmalaknain nimin khan Kolasib district chhunga dragon fruit thar chu Silchar-a sumdawngte hnena hralh tura thawn liam a ni.
Dragon fruit thawn liamna hun kaihruaitu, C. Lallura, President, Kolasib District Dragon Fruit Association chuan dragon fruit an tharte chu Kolasib-ah a hralhna a tam loh avangin Silchar lamah a hralhna an ngaihtuah a, Arjun Phal Bhandhan nen indawrin an hnenah hian an hralh dawn tih a sawi.
C Lalura chuan Kolasib district chhunga tharte atangin bul tan phawt a nih tur thu leh, district danga tharte pawh hralhsak tuma hma an lak zel tum a nih thu a sawi a. Kolasib district-a dragon fruit an tharte chu collection centre siamin kg khat Rs 150-in an leisak thin dawn tih a sawi.
C Zosangliana, DHO Kolasib chuan dragon fruit an hralh tur hi vai liam a. Thusawiin Kolasib district chhunga dragon fruit tharte state pawna thawn chhuah a ni chu lawmawm a tih thu leh dragon fruit chingtute tan ni chhinchhiah tlak tak a nih thu a sawi a. A hlawma dragon fruit hralh chu hun rei tak atanga an lo thlir a nih thu te, hun lo kal zel turah pawh tam zawk an thawn chhuaha dragon fruit chingtute tan hlawkna nasa zawk a thlen theih a beisei thu a sawi bawk.
DHO Kolasib chuan nikum lam aiin kuminah dragon fruit hi an thar tam a beisei thu a sawi a. Association member-te hnenah an thlai tharte chu man to zawka hralhna an lo hria a nih pawhin association-in hralhna a hriatah an hralh hram hram zel a tul thu a sawi a. Association member-ten an hralh duh loh chuan tuna an hmalakna hian awmzia a nei dawn lo tih sawiin, “Association member-te leh hruaitute kan tanrual tlat chuan rate hian awmzia neiin kan thunun thei dawn a, hei hian mipuiteah man tlawm zawka thlai thar hralhna kawngah awmzia a nei thei dawn a ni,” a ti.
Nimina dragon fruit an thawn chhuah hi a bul tanna niin, quintal li an thawn a, DHO Kolasib-in refrigerated van an lo neih hmangin Silchar hi panpui a ni.