PC party Sr.Vice President Vanlalruata’n ‘Mizoram sorkar hian nawmchenna ang maia ngaih theih, ṭul lova sum a senna zawng zawng titawp nghal vek rawh se” a ti.
Nimina PC party pisa-a inkawmkhawmnaah Vanlalruata chuan Finance commissioner-in Mizoram sum dinhmun chhiat zia leh Mizoramin finance-a harsatna a tawh hnaih thu a sawi chungchang a sawina ah he thu hi a sawi a. Tualchhung chanchinbu lama lang Finance commisioner Vanlalchhuanga'n CSS sum pek chhuah tur a nih avanga Mizoramin harsatna a tawh theih tur thu a sawi chu, sorkar sum enkawl thiam loh vang a nih bakah ṭul lova sum sen tam lutuk vang a nih thu a sawi.
Vanlalruata chuan "Mizoramah hian hun rei tawh tak aṭang khan mahni sum dinhmun siamṭhat tum lo leh ngaihtuah miah lovin ṭul lovah sum tam tak tak kan seng thin a. Dân kalha sum chawk kawiin duh duh danin kan kal ṭhin" a ti a. "Finance commissioner thu sawiah pawh inrelbâwlna senso (revenue expenditure) atana dân kalha CSS sum pawhpên ṭhin chu kalphung pangngaia an lo neih hial tawh thu a lang te kha a lungchhiatthlak takzet a ni,' a ti.
PC party Sr.Vice President chuan "Finance commisioner-in CSS sum an hman puk ngam tawh dawn loh avanga sorkarin harsatna nasa tak a tawh tur thu a sawi chu thudik a nih rualin, a lehlam zawng chuan pu berin beng muka liam zawih zawih a sawi laia hetiang thu mipuiin kan hre ta hi a nuihzatthlak hle a ni,' a ti bawk.
Vanlalruata chuan Finance commissioner-in Sri Lanka dinhmun anga din a hlauhawm thu a sawi erawh a dik tawk lo nia sawin, "Tunah hian, a nihna takah chuan Sri Lanka dinhmun ai hian kan chhe zawk hial a ni," a ti a. "Hetiang dinhmun ṭha lo lak aṭanga Mizoram a chhuah theihna awmchhun chu sorkara thuneitu leh milian ho te nuamchen anga ngaih theih hiala an khawsaa, renna nei miah lova mipui sum an hmang leh eirukna tihtawp hi a ni" tiin, "Heng dinhmun ṭha lo lak aṭanga Mizoram chhanchhuak thei tur hian PC party chu kan inring tawk" a ti bawk a ni.