India-a eptu party lian, Congress party President Sonia Gandhi chu sorkar agency-in sum tihchingpen thubuaiah thu a zawt fiah.
A fapa, Rahul Gandhi nen an party sum hmangin real estate hlu tak atanga hlawkna an hmuh ve theih nan suma inremsiamna an siampui nia puh an ni.
Gandhi nufa hian puhna hi an pha ve ve a. Rorel lai, BJP chuan sorkar laipui hnuaia enforcement agency-te chu politics-a phuba lakna hmanrua atan an hmang mai mai niin an sawi.
Ningania pawisa lam buaina chhuitu, Enforcement Directorate (ED) pisa pan tura an in a chhuahsan laiin Congress worker eng emaw zatin lungawi lohna an lantir.
ED pisaah hian a fapain a tawiawm a, ani pawh hi June thla khan he pisaah tho hian thu lo zawh tawh a ni a. Hemi tum hian Gandhi-i pawh hi koh a ni a; mahse, Covid-19 a lo kai avang leh a inenkawl laklawh avangin a kal thei lo.
Kum 75 mi hi damdawi inah dah ngai hialin a awm a, June thla tawp khan a chhuak chauh.
Tun tum hi sorkar laipui hnuaia dan leh thupek kengkawhtuten Gandhi-i thu an zawh fiahna hmasa ber a ni a. BJP hruaituten chuan Congress party-in sorkar laipui hnuaia agency-te hmang dik lova an puhna chu nasa takin an pha.
Gandhi nufa laka thubuai hi BJP hruaitu, Subramanian Swamy-a thubuai thehluh kal zel niin an party sum chu tuna chanchinbu tihtawp tawh, National Herald tichhuaktu firm lei nan an hmang niin a puh a ni.
National Herald chanchinbu hi kum 1938 daih tawha India prime minister hmasa ber, Gandhi-a pu, Jawaharlal Nehru-a bul tan a ni.
Kum 1937-a din, Associated Journals Limited (AJL) leh zalenna sualtu mi hrang hrang 5,000 rualten intawma an tihchhuah a ni.
Kum 1947-a India-in zalenna a sual chhuah khan Nehru-a chu board chairman atanga bângin prime minister a ni ta a ni.
Nehru-a’n chhuahsan mah se Congress party chu he chanchinbu kalhmang (ideology) siamtu lian ber a ni zui a. Party-in puia ni tin tihchhuah a nih thin lai chuan India-a chanchinbumi hriat hlawh tak takte an lo thawk tawh thin.
Sum lama harsatna an tawh avangin kum 2008 khan tihtawp a ni a, kum 2016 khan digital-a tihchhuah leh a ni a, Congress au chhuahna pawimawh tak a ni.
Swamy-a chuan Gandhi nufa hian AJL chu neiha khawpui hrang hranga an ram leh hmun hlu tak tak an chan theih theih nan party sum an hmang niin a puh a. AJL hian Delhi leh Mumbai bakah khawpui dang dangah hmun tha tak tak, Rs. tluklehdingawn 20 man chuang zet tur a nei.
Congress erawh chuan an hruaitu lawk pahnihte puhna hi nasa takin an phatpui a, thubuai chu ‘pawisa pakhat mah tel lohna pawisa tihchingpen thubuai mak tak’ tiin an sawi hial.
June thla khan ED chuan Gandhi-a hi ni nga chhungin darkar 50 vel zet thu an lo zawt tawh a. Hetih chhung hian an party hruaitu leh mi leh sa eng emaw zatin a lam an tang tih entir nan lungawi lohna an lantir nasa hle.
Ningania Gandhi-i thu zawh fiahah hian pungkhawm an tam zawk rin a nih laiin Congress hruaitu hlun leh party thupuangtu, Jairam Ramesh chuan Delhi police-in union home ministry-ah thu an thlen avangin chanchinbumite pawh Congress party hmunpuia luh an phalsak lo niin Twitter-ah a tar lang.
Gandhi-i hi ED office a kalnaah an hruaitu lawk tak takte pawhin an tawiawm a, Ningania parliament thutkhawmah pawh eptute chuan nasa takin an aupui.